ہالی ووڈ کے سب سے بڑے اعزاز آسکر ایوارڈز 2029 سے یوٹیوب پر نشر کیے جائیں گے۔
اکیڈمی آف موشن پکچر آرٹس اینڈ سائنسز اور یوٹیوب کے درمیان اس متعلق ایک اسٹریٹجک شراکت داری طے پا گئی ہے، جس کا آغاز 101ویں آسکر ایوارڈز سے ہوگا۔
اکیڈمی کے سی ای او بل کریمر اور صدر لینیٹ ہاؤل ٹیلر نے اعلان کیا کہ یہ معاہدہ 2033 تک مؤثر رہے گا، جسے ہالی ووڈ کی تاریخ میں ایک بڑی تبدیلی قرار دیا جا رہا ہے۔
مشترکہ بیان میں کہا گیا کہ ہم یوٹیوب کے ساتھ ایک ہمہ جہت عالمی شراکت داری پر خوش ہیں، جو آسکرز اور اکیڈمی کے سال بھر کے پروگرامز کا مستقبل کا پلیٹ فارم ہوگا۔
بیان میں مزید کہا گیا کہ اکیڈمی ایک بین الاقوامی ادارہ ہے اور یہ شراکت داری دنیا بھر کے ناظرین تک اکیڈمی کے کام کو زیادہ مؤثر انداز میں پہنچانے میں مدد دے گی، جس سے فلم انڈسٹری اور اکیڈمی ممبران دونوں کو فائدہ ہوگا۔
یوٹیوب کے سی ای او نیل موہن نے کہا کہ یہ قدم نئی نسل کے فلمی شائقین کو متاثر کرے گا جبکہ آسکرز کی روایات کو بھی برقرار رکھا جائے گا۔
معاہدے کے تحت دنیا بھر کے ناظرین ریڈ کارپٹ سے لے کر ایوارڈ تقریب اور پس پردہ مناظر تک مکمل تقریب کو یوٹیوب پر براہِ راست دیکھ سکیں گے۔
