کراچی (اسٹاف رپورٹر) انڈین پریمیر لیگ کی مجموعی مالیت میں اس سال نمایاں کمی دیکھی گئی ہے، جہاں اس کی ویلیو 20 فیصد کم ہو کر 9.6 ارب ڈالرز رہ گئی ہے۔ برانڈ فنانس کے تازہ اعداد و شمار کے مطابق، گزشتہ سال یہ مالیت 12 ارب ڈالر زتھی۔ صرف گجرات ٹائٹنز واحد ٹیم رہی جس نے اپنی برانڈ ویلیو میں 2 فیصد اضافہ ریکارڈ کیا، جو بڑھ کر 70 ملین ڈالرز ہو گئی ہے۔ ممبئی انڈینز کی برانڈ ویلیو 9 فیصد کم ہو کر 108 ملین، چیمپئن رائل چیلنجرز بنگلورو کی قدر 10 فیصد گر کر 105 ملین ڈالرز ہوگئی ہے۔ چنئی سپر کنگز کی برانڈ ویلیو 24 فیصد کم ہو کر 93 ملین ڈالرز رہ گئی، جبکہ کولکتہ نائٹ رائیڈرز میں 33 فیصد کمی آئی اور یہ 73 ملین ڈالرز پر آ گئے۔ دیگر ٹیموں میں پنجاب کنگز 66 ملین ڈالرز، لکھنؤ سپر جائنٹس 59 ملین ڈالرز اور دہلی کیپیٹلز 26 فیصد کمی کے ساتھ 59 ملین ڈالر زہے۔
عامر خان سابقہ بیویوں کیساتھ گزرا وقت یاد کرنے لگے
بالی ووڈ سپر اسٹار عامر خان نے اپنی سابقہ اہلیہ رینا دتہ اور کرن راؤ کے ساتھ گزرنے والے وقت کو یاد کیا ہے۔
بھارتی میڈیا کے مطابق اس حوالے سے گفتگو کے دوران ان کا کہنا ہے کہ اب میری گرل فرینڈ گوری سپراٹ کے ساتھ قریبی وابستگی ہے۔
60 سالہ عامر خان نے کہا ہے کہ خوش قسمت ہوں کہ میری ملاقات گوری سے ہوئی، جو میرے لیے بہت اہم ہیں اور جن کے ساتھ گہری دلی وابستگی رکھتا ہوں۔
بھارتی میڈیا ادارے سے گفتگو کے دوران انہوں نے اپنے ماضی اور حال کے تعلقات کے بارے میں بتایا اور اپنی سابقہ بیویوں رینا دتہ، کرن راؤ اور گرل فرینڈ گوری سپراٹ کا محبت سے ذکر کیا۔
عامر خان نے کہا کہ میرے اور رینا کے دل میں ایک دوسرے کے لیے آج بھی محبت اور احترام موجود ہے۔
مسٹر پرفیکشنسٹ نے اپنی زندگی میں حاصل ہونے والی ترقی و کامیابی کا کریڈٹ کرن راؤ کو دیا۔
انہوں نے کہا کہ خوش قسمت ہوں کہ مجھے گوری سپراٹ ملیں جن سے گہری دلی وابستگی رکھتا ہوں۔
عامر خان نے اپنی پہلی اہلیہ رینا دتہ کے بارے میں گفتگو میں کہا کہ اچھی تقدیر کے باعث زندگی میں بہت اچھے لوگ ملے، ہم دونوں نے اکٹھے کئی سال گزارے۔
ان کا کہنا ہے کہ محبت ایک بہت طاقت ور جذبہ ہوتا ہے اس میں زخموں کو مندمل کرنے کی صلاحیت ہوتی ہے جبکہ نفرت بہت تھکا دیتی ہے، محبت امید دیتی ہے، کسی چیز کی پرواہ کرنے کا احساس دیتی ہے۔
چین: فعال لائٹر شہری کے پیٹ سے 30 سال بعد برآمد
ایمرجنسی گیسٹرو اسکوپی کے بعد ڈاکٹروں نے اس شخص کے معدے میں مکعب شکل کی ایک چیز دیکھی جس کی ساخت کو معدے کے تیزاب نے بگاڑ دیا تھا۔
تاہم، اس کی ہموار اور چکنی سطح کی وجہ سے متعدد کوششوں کے باوجود نکالا نہیں جا سکا۔
طبی ٹیم نے اس شے کو نکالنے کے عمل کو مؤخر کرنے کا فیصلہ کیا تاکہ وہ اس سے متعلق معلومات حاصل کر سکیں۔
جب اس شخص سے پوچھا گیا کہ کیا اس کو کچھ اندازہ ہے کہ اسکے پیٹ میں موجود یہ مستطیل شکل کی شے کیا ہو سکتی ہے تو اس کو 1990 کی دہائی کے شروع کا ایک واقعہ یاد آگیا جب اس نے دوستوں کے ساتھ شراب کے نشے میں شرط لگا کر پلاسٹک کا لائٹر نگل لیا تھا۔
انہوں نے اس متعلق اپنے خاندان والوں کو کبھی نہیں بتایا اور ان کا خیال تھا کہ یہ ان کے جسم سے کافی عرصہ قبل نکل چکا ہے۔
اس موقع پر انہیں ماضی میں متعدد بار بغیر کسی وجہ کے ہونے والا پیٹ کا درد یاد آیا لیکن ان کے یہ وہم و گمان میں بھی نہیں تھا کہ اس کا سبب وہ لائٹر ہوگا جو انہوں نے تین دہائیوں قبل نگل لیا تھا۔
لائٹر کی تصدیق ہونے کے بعد ٹیم نے اس کو نکالنے کی ترکیب پر غور کیا اور اس کے گرد گھیرا بنا کر اس کو باہر کھینچ لیا۔
اگرچہ، لائٹر کی بیرونی سطح تیزاب سے خراب ہوگئی تھی لیکن اس میں گیس موجود تھی اور ڈاکٹر یہ دیکھ کر رہ گئے کہ وہ لائٹر ابھی بھی جل رہا تھا۔
پی ٹی آئی ورکرز کے حقوق پر ایک اور ڈاکا منظور نہیں: اکبر ایس بابر
پی ٹی آئی کے بانی رکن اکبر ایس بابر نے پی ٹی آئی پارٹی آئین میں تبدیلی اور انٹرا پارٹی الیکشن کے معاملے پر بیان دیا ہے۔
بیان میں انہوں نے کہا ہے کہ پی ٹی آئی کے ورکرز کے بنیادی آئینی حقوق پر ایک اور ڈاکا ڈالنا نامنظور ہے، پی ٹی آئی پر قابض ٹولے نے بار بار جعلی انٹرا پارٹی الیکشن کروائے۔
اکبر ایس بابر نے کہا کہ اس سے پارٹی کو شدید سیاسی اور قانونی نقصان پہنچا، جعلی انٹرا پارٹی الیکشن نے پارٹی کو 8 فروری کو ناقابلِ تلافی نقصان پہنچایا۔
انہوں نے کہا کہ مارچ 2024ء میں ایک اور جعلی انٹرا پارٹی الیکشن کروائے گئے، اس جعلی انٹرا پارٹی الیکشن کو میں نے 5 مارچ 2024ء سے چیلنج کر رکھا ہے، پی ٹی آئی پر قابض ٹولے نے عدالتی ’اسٹے‘ کے ذریعے الیکشن کمیشن کو فیصلہ سنانے سے روک رکھا ہے۔
اکبر ایس بابر نے کہا کہ قابض ٹولے کا پی ٹی آئی کے آئین میں تبدیلی اور انٹرا پارٹی الیکشن کرانے کا ارادہ ہے، یہ اس بات کی تصدیق ہے کہ 3 مارچ 2024ء کے انٹرا پارٹی الیکشن جعلی اور غیر قانونی تھے۔
ان کا کہنا ہے کہ اس وقت پی ٹی آئی کے تمام عہدے دار خود ساختہ، غیر قانونی اور پارٹی پر قابض ہیں، ان کا پی ٹی آئی کے وسائل پر کنٹرول بھی غیر قانونی ہے، الیکشن کمیشن سے ٹی آئی کے تمام بینک اکاؤنٹس منجمد کرنے کی تحریری درخواست کر چکے ہیں۔
اکبر ایس بابر نے کہا کہ الیکشن کمیشن پی ٹی آئی کی خود ساختہ قیادت کو مطلع کر چکا ہے کہ ان کی کوئی قانونی حیثیت نہیں، پی ٹی آئی ورکرز کی امانت ہے، قابض ٹولے نے بار بار اس امانت میں خیانت کی ہے۔
انہوں نے کہا کہ پی ٹی آئی ورکرز کو اپنے مذموم سیاسی عزائم کے لیے استعمال کیا گیا، یہ استحصالی سیاست اب مزید نہیں چلے گی، ہم پی ٹی آئی کو شیخ مجیب الرحمٰن کی ایک اور عوامی لیگ نہیں بننے دیں گے۔
پی ٹی آئی کے بانی رکن نے کہا کہ بانی چیئرمین خود مشکلات کے ذمے دار ہیں، ان کی مشکلات سے نجات کا راستہ صرف قانونی ہے، ملک دشمن سیاست نہیں، نظریاتی رہنما اور کارکنان پارٹی پر قابض ٹولے کے مذموم سیاسی عزائم کا سیاسی اور قانونی محاذ پر مقابلہ کریں گے۔
میانمار کی فوج کا اپنی ایک ریاست کے اسپتال پر فضائی حملہ: 31 افراد ہلاک
میانمار کی فوج نے اپنی ریاست رخائن کے ایک اسپتال پر فضائی حملہ کر دیا جس کے نتیجے میں 31 افراد ہلاک اور 68 زخمی ہو گئے۔
ریسکیو اہلکار کے مطابق میانمار کی فوج نے مغربی ریاست رخائن کے شہر مروک اُو کے اسپتال پر رات گئے حملہ کیا۔
ریسکیو اہلکار کے مطابق حملے کے سبب ہونے والی ہلاکتوں میں اضافے کا خدشہ ہے۔
واضح رہے کہ میانمار نے 28 دسمبر کو انتخابات کا اعلان کر رکھا ہے۔
پاکستانی زیتون کے تیل کا معیار اسپین سے بہتر ہے: احسن اقبال
وفاقی وزیرِ منصوبہ بندی و ترقیات احسن اقبال نے کہا ہے کہ پاکستان میں 6 لاکھ ہیکٹر سے زائد زمین چائے کی کاشت کے لیے موزوں ہے، پاکستانی زیتون کے تیل کا معیار اسپین کے زیتون سے بہتر ہے۔
اسلام آباد میں پاکستان میں چائے کی کمرشلائزیشن اسٹریٹجی سے متعلق تقریب سے خطاب کرتے ہوئے انہوں نے کہا کہ چائے کی مقامی پیداوار زرِ مبادلہ بچانے اور برآمدات بڑھانے میں کلیدی کردار ادا کرے گی۔
احسن اقبال نے کہا کہ پاکستان چائے کی درآمد پر سالانہ 65 کروڑ ڈالرز کا خطیر زرِمبادلہ خرچ کر رہا ہے۔
انہوں نے کہا کہ پاکستان میں چائے کی پیداوار صرف آغاز ہے، مکمل ویلیو چین کو فعال بنا کر اربوں ڈالرز کما سکتے ہیں، اڑان پاکستان کے تحت 26 زرعی کلسٹرز کی نشاندہی کی گئی ہے۔
وفاقی وزیر نے کہا کہ پیکجنگ اور برانڈنگ کے مؤثر اقدامات سے پاکستانی چائے عالمی مارکیٹ میں نمایاں مقام حاصل کرے گی، حکومت کی کوشش برآمدات بڑھانے اور درآمدات کم کرنے پر مرکوز ہے۔
احسن اقبال نے کہا کہ حکومت 1000 زرعی سائنسدانوں اور محققین کو چین میں جدید تربیت کے لیے بھیج چکی ہے، یہ سائنسدان زرعی ٹیکنالوجیز کے ذریعے ملک میں زرعی انقلاب لانے میں اہم کردار ادا کریں گے۔
ان کا کہنا ہے کہ آم اور کھجور پاؤڈر تیار کر کے برآمدات میں نمایاں اضافہ کیا جا سکتا ہے، عالمی معیار کے مطابق ہے، زیتون کا تیل پاکستان کے لیے ایک نئی برآمدی راہداری ثابت ہو سکتا ہے۔
پاکستان انڈر 19 کرکٹ ٹیم دبئی پہنچ گئی
کراچی پاکستان انڈر 19 ٹیم اے سی سی ایشیا کپ کیلئے بدھ کو کراچی سے دبئی پہنچ گئی۔ آٹھ ٹیموں کا ون ڈے ٹورنامنٹ 12 سے 21 دسمبر تک کھیلا جائے گا۔…
عظمیٰ گیلانی نے ٹیلی وژن چھوڑنے کی جذباتی وجہ بتا دی
پی ٹی وی کی معروف سینئر اداکارہ عظمیٰ گیلانی نے اپنے کیریئر کے عروج پر ٹی وی چھوڑنے کی اصل اور جذباتی وجہ بیان کر دی۔
عظمیٰ گیلانی پاکستان کے کلاسک ڈراموں کی پہچان رہی ہیں، ان کے مقبول ترین ڈراموں میں درجنوں شاہکار شامل ہیں، وہ گزشتہ کئی سالوں سے آسٹریلیا میں مقیم ہیں۔
ان دنوں عظمیٰ گیلانی پاکستان کے دورے پر ہیں، جہاں وہ مختلف ٹی وی اور ریڈیو پروگراموں میں شرکت کر رہی ہیں اور اپنے ساتھی فنکاروں سے ملاقاتیں بھی کر رہی ہیں، حال ہی میں وہ ایک پروگرام میں شریک ہوئیں، جہاں انہوں نے پہلی بار کھل کر بتایا کہ انہوں نے شوبز کو کیوں چھوڑا۔
پروگرام میں گفتگو کرتے ہوئے عظمیٰ گیلانی نے بتایا کہ اشفاق احمد صاحب نے ایک بار مجھ سے کہا تھا کہ تم بہت گہرا پیار کرنے والی ہو، تم اپنے بچوں سے اتنی محبت کرتی ہو تو اُنہیں چھوڑ کیسے پاؤ گی؟
اُنہوں نے مزید کہا کہ بچوں کی محبت نے مجھے آسٹریلیا جانے پر مجبور کیا، یہ میری سب سے بڑی قربانی تھی کہ اپنے کیریئر کے عروج پر میڈیا چھوڑ کر بچوں کے پاس چلی گئی، میں نے سوچا اگر زندگی کے صرف دس سال بھی رہ جائیں، تو میں اپنے بچوں سے صرف چند دن ہی مل پاؤں گی، اس لیے میں نے فیصلہ کیا کہ میں ہمیشہ اُن کے ساتھ رہوں۔
اداکارہ نے اپنے بچپن کی مالی مشکلات کا ذکر کرتے ہوئے بتایا کہ والد کے انتقال کے بعد حالات بہت خراب ہو گئے تھے اور میرے چچا نے چھ بچوں کی پرورش کے لیے فوج چھوڑ کر دوسری ملازمت اختیار کی، میں نے اپنی شادی کے لیے رشتے کے لیے اس لیے ہاں کی کہ چچا کی مالی ذمہ داری کچھ کم ہو جائے۔
نیشنل گیمز؛ سندھ کیلئے پوزیشن یافتہ کائنات سے امتیازی سلوک، ایونٹ سے باہر کردیا گیا
کراچی میں جاری 35 ویں نیشنل گیمز میں 10 ہزار میٹر میں سندھ کے لیے تیسری پوزیشن حاصل کر کے برونز میڈل جیتنے والی 9 سالہ کائنات خلیل ابراہیم کو حیرت انگیز طور پر خواتین کی 5 ہزار میٹر کی دوڑ سے ڈس کوالیفائی کر دیا گیا۔
منتظمین کا کہنا تھا کہ آئی او سی اور عالمی فیڈریشن کے قواعد کے مطابق 16 برس سے کم عمر ایتھلیٹ اوپن مقابلوں میں شرکت کے اہل نہیں۔
کھیلوں کے حلقوں کا کہنا ہے کہ سلیکشن کے وقت اس پہلو کو کیوں نظر انداز کیا گیا۔ مزید براں نیشنل گیمز میں ایتھلیٹکس مقابلے قومی فیڈریشن کے تحت نہیں بلکہ ایک کمیٹی کے تحت منعقد ہوئے۔ ان مقابلوں کے نتائج انٹرنیشنل ایتھلیٹکس فیڈریشن تسلیم نہیں کرے گی۔
علاوہ ازیں انٹرنیشنل فوائد کے مطابق ایتھلیٹکس مقابلوں میں درکار مطلوبہ معیار کے اسٹاپ واچ بھی نہیں تھیں، ایسے مقابلوں کے نتائج تسلیم نہیں کی جاتے، کائنات خلیل ابراہیم سراسر زیادتی کا شکار ہوئی، 10 ہزار میٹر کی میڈلسٹ کو5ہزار میٹر کی دوڑ سے الگ کر دینا حیرت انگیز اور منتظمین کے لیے سبکی کا باعث بنا۔
بذریعہ کے فور کراچی کو روز 260 ملین گیلن پانی فراہم ہو گا: وزیرِ اعلیٰ سندھ
کراچی میں پانی کے بحران سے نمٹنے کے لیے وزیرِ اعلیٰ سندھ سید مراد علی شاہ کی زیرِ صدارت اجلاس ہوا۔
ترجمان کے مطابق وزیرِ اعلیٰ نے اس موقع پر کہا کہ پانی کی ضروریات پوری کرنے کے لیے منصوبوں پر کام کر رہے ہیں، کراچی میں پائیدار پانی کی فراہمی یقینی بنائیں گے۔
انہوں نے کہا کہ کے فور پروجیکٹ کے ذریعے کراچی کو روز 260 ملین گیلن پانی فراہم ہو گا۔
اجلاس میں کے فور توسیع، 260 ایم جی ڈی بلک واٹر سپلائی، کلری بگیار فیڈر کی لائننگ اور حب ڈیم منصوبوں کاجائزہ لیا گیا۔
اجلاس کو بریفنگ میں بتایا گیا کہ کے فور پروجیکٹ پر کام 2020ء سے واپڈا کے زیرِ انتظام جاری ہے، ایڈوانس پریشرائزڈ پائپ لائن سسٹم سے کراچی کے پانی کا مسئلہ حل کرنے کا منصوبہ ہے۔
وزیرِ اعلیٰ سندھ نے کہا کہ کے فور منصوبے کی مکمل فعالیت کے لیے بجلی سپلائی کے طریقہ کار کی تکمیل ضروری ہے۔
وزیراعلیٰ سندھ مراد علی شاہ کو بریفنگ میں بتایا گیا کہ کراچی کے اندر کے فور توسیع کا کام جاری ہے، یونیورسٹی روڈ پر پائپ بچھانے کا کام تیز رفتاری سے کیا جا رہا ہے۔
اجلاس کو نئے بلک واٹر کو موجودہ تقسیم نیٹ ورک میں شامل کرنے کے منصوبے سے آگاہ کیا گیا اور بتایا گیا کہ آر ون سے ضلع شرقی اور غربی کو بھی فوری سپورٹ فراہم کی جائے گی۔
حکام نے بریفنگ میں بتایا کہ گُلشنِ معمار کی 66 انچ لائن اور پرانے سسٹم آر ٹو کے ذریعے مستحکم کیے جائیں گے۔
وزیرِ اعلیٰ نے ہدایت کی کہ محدود تعمیراتی ونڈو میں وسائل کو متحرک کیا جائے، کوٹری بیراج دسمبر میں بند ہوتا ہے، منصوبے کی تکمیل میں اہم سنگِ میل ہے۔
وزیرِ اعلیٰ سندھ نے حب ڈیم کی دیکھ بھال کے لیے فنڈز جاری کرنے کی منظوری دے دی، انہوں نے آر بی او ڈی ڈرینج سسٹم کی فوری بحالی پر بھی زور دیا۔
وزیرِ اعلیٰ نے واپڈا اور سندھ ایریگیشن کے درمیان مربوط نقطۂ نظر کی ہدایت بھی کی۔