اتر پردیش کے وزیر سنجے نشاد خاتون ڈاکٹر کا نقاب کھینچنے کے واقعے پر بہار کے وزیر اعلیٰ نتیش کمار کے دفاع میں سامنے آگئے اور متاثرہ خاتون سے متعلق مزید ہتک آمیز بیان دے دیا۔
حالیہ متنازع بیان میں یو پی کے وزیر نے کہا کہ نقاب ہی تو کھینچا ہے، اگر کہیں اور ہاتھ لگ جاتا تو؟
انہوں نے نتیش کمار کے حالیہ اقدام کا دفاع کرتے ہوئے ایک نہایت غیر مناسب اور اشتعال انگیز بیان دے کر نیا تنازع کھڑا کر دیا ہے۔
سنجے نشاد نے پٹنہ میں منعقدہ ایک تقریب کے دوران مسلم خاتون ڈاکٹر کا حجاب کھیچنے کے واقعے پر ردِعمل دیتے ہوئے کہا کہ ارے وہ بھی تو آدمی ہیں، ان کے پیچھے نہیں پڑنا چاہیے، صرف نقاب کو ہاتھ لگانے سے اتنا ہنگامہ مچ گیا، اگر نتیش کمار کہیں اور ہاتھ لگا دیتے تو کیا ہو جاتا؟
واضح رہے کہ یوپی کے وزیر سنجے نشاد یوگی آدتیہ ناتھ حکومت کی دوسری مدت میں کابینہ وزیر کے طور پر خدمات انجام دے رہے ہیں۔ یہ بیان دیتے وقت وہ مسکراتے اور ہنستے دکھائی دیے، جس پر مختلف عوامی اور سیاسی حلقوں میں شدید غم و غصہ پایا جا رہا ہے۔
