امریکا میں گزشتہ تین دہائیوں سے مقیم 60 سالہ بھارتی نژاد خاتون بابل جیت کور کو گرین کارڈ کے آخری مرحلے کے انٹرویو کے دوران امیگریشن حکام نے گرفتار کر لیا۔
بھارتی میڈیا کے مطابق بابل جیت کور عرف ببلی کی گرفتاری کا واقعہ یکم دسمبر کو پیش آیا جب وہ بائیومیٹرک اسکین کے لیے امیگریشن دفتر پہنچیں۔
بابل جیت کے اہلِ خانہ کے مطابق ببلی کور کو اچانک ایک کمرے میں بلایا گیا جہاں موجود امریکی اہلکاروں نے اِنہیں گرفتار کرنے سے متعلق آگاہ کیا اور اپنے وکیل سے فون پر بات کرنے کے لیے کہا۔
اہلِ خانہ کے مطابق بابل جیت کور کو اسی دن رات گئے امیگریشن حراستی مرکز کے طور پر استعمال ہونے والی وفاقی جیل ایڈیلینٹو منتقل کر دیا گیا جہاں وہ تاحال زیرِ حراست ہیں۔
بھارتی میڈیا کے مطابق ببلی کور کے گرین کارڈ کی درخواست پہلے سے منظور شدہ پٹیشن کے تحت دائر کی گئی تھی جو اِن کی ایک امریکی شہریت رکھنے والی بیٹی اور گرین کارڈ رکھنے والے شوہر نے دائر کی تھی۔
بھارتی میڈیا کا کہنا ہے کہ ببلی کور کے تین بچے ہیں جن میں سے دو امریکی شہری ہیں، ببلی کور نے امریکا میں گزشتہ 30 سال کے دوران متعدد جگہ نوکریاں بھی کی ہیں، خاندان قانونی کارروائی کے ذریعے ضمانت پر رہائی کی کوشش کر رہا ہے۔
