بالی ووڈ کے معروف اداکار سیف علی خان نے اپنی زندگی کے ایک نہایت تکلیف دہ اور خوفناک تجربے کو یاد کرتے ہوئے اپنے سب سے بڑے خوف سے پردہ اٹھادیا۔
دی ہالی ووڈ رپورٹر کو دیے گئے ایک انٹرویو میں فلم کل ہو نہ ہو کے اداکار نے اپنے گھر میں ہونے والی ڈکیٹی کی واردات پر بات کی، واقعے میں ملوث حملہ آور کے متعدد چاقو کے وار سے وہ شدید زخمی ہوگئے تھے۔
سیف علی خان نے بتایا کہ میں اس واقعے میں شدید زخمی ہوا تھا، مگر جس بات نے مجھے سب سے زیادہ خوفزدہ کیا وہ مستقل معذوری کا خدشہ تھا، چوٹ میری ریڑھ کی ہڈی کے قریب لگی تھی، جو مجھے زندگی بھر کے لیے مفلوج بھی کر سکتی تھی۔
بالی وود اداکار نے کہا کہ میں خود کو بے حد خوش قسمت اور شکر گزار سمجھتا ہوں کہ میں اس واقعے سے اس طرح بچ نکلا، کیونکہ صورتحال بہت خراب تھی، میری ریڑھ کی ہڈی پر زخم آیا تھا، جس کے باعث کچھ دیر کے لیے میری ٹانگ میں احساس ختم ہوگیا تھا اور اس سے فالج کا خطرہ پیدا ہو سکتا تھا۔
انہوں نے مزید کہا کہ ہمیشہ کے لیے بستر تک محدود ہو جانا یا مفلوج ہو جانا ایک خوفناک تصور ہے اور یہ خوف آج بھی مجھے ڈراتا ہے، شاید یہی وجہ ہے کہ میں اب اپنی صحت کی قدر زیادہ کرتا ہوں اور ہر لمحے شکر گزار رہتا ہوں۔
