مذہب کی خاطر شوبز انڈسٹری چھوڑنے والی سابقہ پاکستانی اداکارہ سارہ چوہدری نے انکشاف کیا ہے کہ انہیں شوبز کیریئر کے آغاز میں متعدد غیر مہذب آفرز موصول ہوئیں۔
سارہ چوہدری نے حال ہی میں ایک پوڈ کاسٹ میں بطور مہمان شرکت کی جہاں اُنہوں نے شوبز کی دنیا کے تلخ حقائق کے بارے میں بات کی۔
اُنہوں نے بتایا کہ شوبز انڈسٹری صرف ہراساں کیے جانے تک ہی محدود نہیں ہے بلکہ اس انڈسٹری کو زیادہ توجہ اس لیے ملتی ہے کیونکہ اس کے بارے میں عوامی تاثر یہ ہے کہ یہاں کام کرنے والے افراد کے کردار اچھے نہیں ہوتے۔
سابقہ اداکارہ نے بتایا کہ شوبز انڈسٹری کے بارے میں عام اسی تاثر کی وجہ سے نئے آنے والوں کو نامناسب آفرز کثرت سے موصول ہوتی ہیں۔
اُنہوں نے مزید بتایا کہ کیریئر کی ابتداء میں میری والدہ ہر جگہ میرے ساتھ جاتی تھیں اس کے باوجود بھی ابتدائی چند مہینے میرے فیملی کے لیے بہت مشکل تھے۔
سارہ چوہدری نے انکشاف کیا کہ شوبز انڈسٹری کے اندر کے لوگوں نے انتہائی نامناسب آفرز کیں جس کی وجہ سے میری والدہ بہت پریشان ہوئیں یہاں تک کہ ایک وقت آیا کہ وہ رو پڑیں اور مجھ سے اداکاری چھوڑ کر دوبارہ پڑھائی شروع کرنے کو کہا۔
اُنہوں نے یہ بھی بتایا کہ میں نے شوبز میں کام کرتے ہوئے اپنے لیے کچھ حدود طے کیں اور اپنی پوری کوشش کی کہ انہیں کبھی عبور نہ کروں۔
