کوئٹہ کی خواتین کو بہتر سفری سہولت کی فراہمی کے لیے پنک بس اور شہریوں کے لیے گرین بسوں میں اضافے کے منصوبے کو عملی جامہ پہنانے کے لیے بلوچستان کے سیکریٹری ٹرانسپورٹ بسوں کی خریداری کے لیے بیرون ملک چلے گئے۔
بلوچستان حکومت نے گزشتہ مالی سال کے بجٹ میں کوئٹہ کے شہریوں کے لیے گرین بس منصوبے میں چار مزید بسوں کے اضافے اور خواتین مسافروں کے لیے چار پنک بسوں کی خریداری کا اعلان کیا تھا مگر ایک سال کا عرصہ گزر جانے کے باوجود یہ منصوبہ مکمل نہ ہوسکا۔
اسی سلسلے میں محکمہ ٹرانسپورٹ کے حکام کا کہنا ہے کہ بلوچستان کے سیکریٹری ٹرانسپورٹ بسوں کی خریداری کے لیے بیرون ملک گئے ہوئے ہیں۔
حکام کے مطابق امید ہے کہ ایک ماہ تک پنک اور گرین بسیں کوئٹہ پہنچ جائیں گی۔
محکمۂ ٹرانسپورٹ کے حکام کا کہنا ہے کہ کوئٹہ میں چلنے والی 8 گرین بسوں میں روزانہ آٹھ ہزار افراد سفر کرتے ہیں۔
