مشیر اطلاعات خیبر پختونخوا بیرسٹر محمد علی سیف نے کہا کہ کے پی کابینہ کے اجلاس میں پائیدار امن کے لیے آئندہ ہفتے اے پی سی بلانے کا اعلان کیا گیا ہے۔
پشاور سے اپنے بیان میں انھوں نے صوبائی کابینہ کے اجلاس کے دوران فیصلوں کی منظوری سے متعلق بتایا۔
انہوں نے کہا کہ کابینہ نے بھارتی جارحیت سے کے پی میں شہید افراد کے لواحقین کیلئے فی کس 50 لاکھ روپے کی منظوری دی، مولانا خانزیب شہید کے اہل خانہ کیلئے ایک کروڑ روپے مالی امداد کی منظوری بھی دی گئی۔
کابینہ نے کے پی زرعی آمدن ٹیکس رولز 2025، ماحولیاتی آڈٹ رولز 2025 اور ماحولیاتی تحفظ رولز 2025 کی منظوری بھی دی۔
انھوں نے کہا کابینہ نے 4 شہریوں کے علاج کے لیے 4 کروڑ 81 لاکھ روپےکی مالی امداد کی منظوری دی، جبکہ مختلف محکموں کی گاڑیوں کی خریداری پر عائد پابندی میں نرمی کی درخواستیں کابینہ میں پیش کی گئیں۔
بیرسٹر سیف نے کہا ایسی گاڑیوں کابندوبست ضروریات کو دیکھتے ہوئے محکمہ ایکسائز کے ذریعے کیا جائے گا، اجلاس میں 3 ایم پی او قانون میں اصلاحات پر غور کیا گیا۔
انھوں نے کہا فیصلہ کیا گیا ہے کہ اس قانون کا نفاذ محکمہ داخلہ کی پیشگی اجازت سے مشروط ہوگا، 3 ایم پی او ایف سی آر جیسے قانون کی طرز پر ہے جس کا اکثر غلط استعمال ہوتا ہے۔
