وزیرِ اعلیٰ پنجاب مریم نواز شریف نے پی ڈی ایم اے ہیڈ کوارٹرز کا دورہ کیا جہاں انہیں سیلابی صورتحال اور ریسکیو آپریشنز سے متعلق تفصیلی بریفنگ دی گئی۔
وزیرِ اعلیٰ کو حفاظتی انتظامات اور آلات سے متعلق آگاہ کیا گیا۔ اس موقع پر وزیرِاعلیٰ پنجاب مریم نواز نے ابتدائی وارننگ سسٹم کا مشاہدہ بھی کیا۔
بریفنگ میں بتایا گیا کہ بارشوں اور سیلابی ریلے کی آمد پر آرمی اور ضلعی انتظامیہ کی ٹیموں نے بروقت اور مؤثر کارروائی کی۔
بریفنگ میں کہا گیا کہ پنجاب کے تین متاثرہ اضلاع میں سیلابی ریلے میں گرے ہوئے 1063 افراد کو بحفاظت نکالا گیا، صوبے میں سیلابی ریلے میں پھنسے افراد کو اوسطاً صرف 23 منٹ کے اندر محفوظ مقامات پر پہنچایا گیا۔
راولپنڈی میں سیلابی ریلے میں پھنسے 6 افراد کو ہیلی کاپٹر کی مدد سے ریسکیو کیا گیا جبکہ ریسکیو 1122 نے 450 افراد کی جانیں بچائیں۔
وزیرِ اعلیٰ پنجاب کو دی گئی بریفنگ کے مطابق چکوال میں 27 افراد کو ہیلی کاپٹر کے ذریعے ریسکیو کیا گیا جبکہ ریسکیو 1122 نے 182 افراد کو محفوظ بنایا۔
جہلم میں 160 افراد کو ہیلی کاپٹر کی مدد سے ریسکیو کیا گیا، ریسکیو 1122 نے 174 اور پاک فوج نے 64 افراد کو محفوظ مقامات پر منتقل کیا۔
پی ڈی ایم اے ہیڈ کوارٹرز کے دورے کے دوران وزیرِ اعلیٰ مریم نواز شریف نے تمام ریسکیو ٹیموں کی انتھک محنت کو سراہا اور متاثرین کی فوری مدد اور محفوظ منتقلی کو اولین ترجیح قرار دیا۔
اس موقع پر خصوصی گفتگو کے دوران مریم نواز نے کہا کہ ٹیکنالوجی کا دور ہے، عوام کو بروقت آگاہ رکھیں، فیلڈ میں اتریں اور خود سے عوام کی مشکلات کو کم کرنے کی کوشش کریں۔
مریم نواز نے ہدایت جاری کرتے ہوئے کہا کہ مجھے کہیں بھی پانی کھڑا نظر نہیں آنا چاہیے، یہ کمشنرز اور ڈی سیز کی ذمہ داری ہے، ہماری فصلیں تباہ ہو رہی ہیں، ان کی فہرست تیار کریں تاکہ ہم بعد ازاں کسان کی مالی طور پر مدد کر سکیں۔
ان کا کہنا تھا کہ کل جو ریلیف آپریشن کیا گیا میں نے خود سارا مانیٹر کیا تھا۔ سب کو شاباشی دیتے ہوئے کہا کہ مریم نواز نے کہا کہ ہم سب عوام کے ساتھ ہیں کھڑے ہیں، عوام کی مدد پر فوکس رکھیں۔
انہوں نے کہا کہ جتنی بھی اموات ہوئی ہیں یہ سب ناگہانی آفت کے سبب ہوئیں، حکومت یا حکومتی اداروں کی غفلت کی وجہ سے کسی کی جان نہیں گئی ہے، سب نے بڑے احسن طریقے سے اپنی ذمہ داریاں نبھائی ہیں۔
