جاپان میں مقیم معروف کشمیری و کشمیر یکجہتی فورم جاپان کے چیئرمین شاہد مجید ایڈووکیٹ نے کہا ہے کہ 5 اگست بروز منگل کو مقبوضہ کشمیر کی آئینی حیثیت ختم کرنے اور مقبوضہ کشمیر کے عوام پر بھارتی فوج کے ظلم کے خلاف دنیا بھر میں کشمیری یوم سیاہ منائیں گے۔
انہوں نے دنیا بھر میں مقیم کشمیری و پاکستانی برادری سے اپیل کی ہے 5 اگست سے دنیا بھر میں یوم استحصال اور یوم سیاہ کی تقریبات منعقد کریں اور بھارتی سفارتخانوں کے سامنے مظاہرے کریں۔
انہوں نے گفتگو کرتے ہوئے کہا کہ مقبوضہ کشمیر کے عوام پر کرفیو لگا کر بنیادی انسانی حقوق معطل کیے ہوئے ہیں، ظلم و ستم کا بازار گرم کرتے ہوئے بھارتی حکومت نے حریت رہنماؤں سمیت عوام کو گرفتار کر کے حراست میں رکھا ہوا ہے۔
شاہد مجید ایڈووکیٹ نے دنیا بھر کی انسانی حقوق کی تنظیموں اور بین الاقوامی ذرائع ابلاغ سے مطالبہ کیا ہے کہ مقبوضہ کشمیر کے عوام پر ہونے والے مظالم پر کشمیری عوام کا ساتھ دیں۔
شاہد مجید نے کہا ہے کہ بھارتی حکومت نے کشمیر میں آئینی دہشت گردی کا بازار گرم کر رکھا ہے اور مقبوضہ کشمیر میں ہر طرح کی پابندیاں لگائی ہوئی ہیں جس کی وجہ سے کشمیری عوام کا دنیا سے بھی رابطہ منقطع ہے۔
انہوں نے اعلان کیا ہے کہ مقبوضہ کشمیر میں بھارتی حکومت کی آئینی دہشت گردی پر جاپان میں ہر پلیٹ فارم پر بھرپور آواز اٹھائی جاتی رہے گی۔
اُن کا کہنا تھا کہ ٹوکیو میں جاپان کی دینی، سیاسی اور سماجی شخصیات کے تعاون سے اقوامِ متحدہ کے دفتر اور بھارتی سفارتخانے کو یاداشت پیش کرنے کے ساتھ ساتھ پرامن احتجاج بھی کیا جائے گا۔
