فیڈرل بورڈ آف ریونیو (ایف بی آر) کا کہنا ہے کہ 2 لاکھ روپے بینک میں جمع کروانے پر ٹیکس کٹوتی نہیں ہو گی۔
ایف بی آر کی جانب سے یہ یقین دہانی اسلام آباد میں آل پاکستان تنظیمِ تاجران کے وفد کے ایف بی آر حکام سے مذاکرات میں کرائی گئی۔
ایف بی آر نے یقین دہانی کرائی کہ ڈیجیٹل انوائسنگ چھوٹے تاجروں اور ریٹیلرز پر لاگو نہیں ہوگی، ڈیجیٹل انوائسنگ صرف بزنس ٹو بزنس سیلز ٹیکس رجسٹرڈ کمپنیوں پر مرحلہ وار لاگو ہو گی۔
ایف بی آر کا کہنا ہے کہ ڈیجیٹلائزیشن کمیٹی میں تاجر نمائندوں کو شامل کیا جائے گا، سیلز ٹیکس قانون 37 اے اور 37 بی کا اطلاق چھوٹے تاجروں پر نہیں ہو گا۔
فیڈرل بورڈ آف ریونیو کے مطابق کسی بڑے صنعت کار کو بھی سیلز ٹیکس قانون کے تحت گرفتار نہیں کیا جائے گا، سیلز ٹیکس قانون 37 اے اور 37 بی کا مقصد جعلی انوائسز کی روک تھام ہے۔
ایف بی آر کا کہنا ہے کہ مارکیٹوں میں کسٹم کے چھاپوں کے خلاف الگ اجلاس میں نیا میکنزم طے ہو گا، اس حوالے سے ملاقات میں اس پر اتفاق کیا گیا ہے۔
فیڈرل بورڈ آف ریونیو کا کہنا ہے کہ موبائل فونز پر ٹیکس اصلاحات کےلیے تاجروں سے مشاورت کی جائے گی۔
اعلامیے میں بتایا گیا ہے کہ تاجر رہنماؤں کاشف چوہدری، خواجہ سلمان صدیقی، شرجیل میر و دیگر نے ٹیکس نظام پر مؤقف پیش کیا۔
تاجر رہنماؤں کا مؤقف ہے کہ کسی صورت ظالمانہ ٹیکسز قبول نہیں کریں گے۔
