وزیر خزانہ محمد اورنگزیب نے چینی کی بڑھتی قیمتوں پر واضح جواب دینے سے گریز کرتے ہوئے کہا کہ رمضان آئے یا کوئی اور ایونٹ ہو غذائی اشیا کی قیمتیں اوپر نیچے ہوجاتی ہیں، گندم اور چینی کو بھی ڈی ریگیولیٹ کر دینا چاہیے۔
کراچی میں گفتگو کرتے ہوئے وزیر خزانہ نے کہا کہ بیرونی سرمایہ کاروں کا منافع باہر جانے اور ایل سی نہ کھلنے کے مسائل ختم ہوگئے ہیں، ان کی رائے میں شرح سود میں کمی کی گنجائش موجود ہے فیصلہ اسٹیٹ بینک کو کرنا ہے۔
وزیر خزانہ نے کہا کہ حکومت کے پاس جتنی مالیاتی اسپیس تھی اتنا ریلیف تنخواہ داروں کو دے چکے ہیں، تنخواہ داروں کی سہولت کیلئے ٹیکس گوشواروں کو آسان بنا دیا ہے، چھوٹے اور پہلی مرتبہ مکان بنانے والوں کیلئے سستے قرض کی اسکیم جلد شروع کر رہے ہیں۔
