کراچی (اسٹاف رپورٹر) پاکستانی کرکٹ ٹیم نےہفتے کو ایک دن کے آرام کے بعد اتوارکی شام کو نیشنل اسٹیڈیم میں بنگلہ دیش کی سیریز کی تیاریاں شروع کردیں۔ منگل کی صبح گیارہ بجے ٹیم کراچی سے ڈھاکا روانہ ہوگی۔ دوسری جانب ٹی ٹوئنٹی سیریز کے میڈیا رائٹس فروخت ہو گئے ہیں ۔ بنگلہ دیشی میڈیا کے مطابق بی سی بی 3 میچوں کی سیریز کے ورلڈ وائیڈ میڈیا رائٹس فروخت کرنے میں کامیاب ہوگیا۔ حقوق اوپن بڈنگ میں فروخت ہونا تھے لیکن کوئی کمپنی بیس پرائس تک نہ پہنچ سکی، اطلاعات کے مطابق 4 کروڑ ٹکا پرائس رکھی گئی، نصف تک کی بھی پیشکش نہ ہوئی۔بنگلہ دیش بورڈ آفیشل کا کہنا ہے کہ پیشکشیں احمقانہ تھیں کچھ کمپنیز سے براہ راست رابطہ کیا گیا، بورڈ کو ٹارگٹ کے مطابق رقم مل گئی ہے۔ واضح رہے کہ اس سے قبل بی سی بی بنگلہ دیش اور نیوزی لینڈ ٹیسٹ سیریز کے رائٹس فروخت نہیں کر سکا تھا۔
