اسلام آباد( اسرار خان ) جنیوا میں قائم ادارے پریس ایمبلم کیمپین کی رپورٹ کے مطابق سال 2025 کے پہلے چھ ماہ کے دوران دنیا کے 26 ممالک میں کم از کم 86 صحافی اور میڈیا ورکرز قتل کیے گئے، جو گزشتہ سال اسی عرصے کے مقابلے میں 16 فیصد اضافہ ہے۔ پاکستان سے تین صحافیوں کی ہلاکتیں رپورٹ ہوئیں جبکہ اسی عرصے کے دوران بھارت میں 4 صحافیوں کی ہلاکتیں رپورٹ ہوئیں۔صحافیوں کی ہلاکتوں میں اس اضافے کی بڑی وجہ غزہ میں جاری جنگ بنی، جہاں جنوری سے اب تک اسرائیلی افواج کے ہاتھوں کم از کم 31 فلسطینی صحافی مارے گئے۔PEC کے صدر بلیز لمپن نے کہا، “یہ ایک بے مثال پیمانے پر قتلِ عام ہے۔” ان کے مطابق اکتوبر 2023 سے اب تک تقریباً 200 صحافی غزہ میں شہید ہو چکے ہیں۔انہوں نے کہا، “اس سانحے کی براہ راست ذمہ دار اسرائیلی حکومت ہے، جو غزہ کی صورتِ حال پر رپورٹنگ کرنے والے شہریوں کو نشانہ بنا رہی ہے۔” لمپن نے زور دیا کہ ان جنگی جرائم میں ملوث اسرائیلی فوجیوں کی شناخت اور ان کے خلاف قانونی کارروائی ضروری ہے۔انہوں نے فوری جنگ بندی اور بین الاقوامی احتسابی نظام کے قیام پر بھی زور دیا۔جنوبی ایشیا بدستور صحافیوں کے لیے خطرناک خطہ بنا ہوا ہے، جہاں 2025 کی پہلی ششماہی میں بھارت میں 4 اور پاکستان میں 3 صحافی قتل ہوئے۔PEC نے پاکستانی ہلاکتوں کی شناخت یا حالات فوری طور پر ظاہر نہیں کیے، تاہم صحافتی آزادی کے علمبردار طویل عرصے سے پاکستان میں میڈیا ورکرز کی بگڑتی ہوئی سیکیورٹی صورتحال پر خبردار کرتے آ رہے ہیں، خاص طور پر سیاسی عدم استحکام اور سنسرشپ کے تناظر میں۔سوڈان کی خانہ جنگی میں 6 صحافیوں کی جانیں گئیں، جبکہ میکسیکو — جو جنگ زدہ علاقوں کے سوا صحافیوں کے لیے دنیا کا خطرناک ترین ملک سمجھا جاتا ہے — میں ماہانہ اوسطاً ایک کے حساب سے 6 میڈیا ورکرز قتل کیے گئے۔
