سابق وزیرِ اعظم اور عوام پاکستان پارٹی کے سربراہ شاہد خاقان عباسی کا کہنا ہے کہ ملک کا مستقبل آئین کی بالا دستی اور قانون کی حکمرانی میں ہے، نواز شریف سے ذاتی تعلق ہے جب بھی انہوں نے یاد کیا میں چلا گیا۔
کہوٹا میں میڈیا سے گفتگو میں شاہد خاقان عباسی کا کہنا تھا کہ مسلم لیگ ن نے ووٹ کو عزت دو کا بیانیہ چھوڑ دیا، مگر میں آج بھی اس بیانیے پر قائم ہوں۔
شاہد خاقان عباسی نے کہا ہے کہ ن لیگ کی سیاست سے اتفاق نہیں، میں کسی ناراضگی کے تحت نہیں آیا، ماضی میں ہر سیاسی لیڈر جیل گیا۔
انہوں نے کہا ہے کہ کسی تحریک کی بنیاد یہ نہیں ہو سکتی کہ بانیٔ پی ٹی آئی کو جیل سے نکالیں، حکومت کام نہیں کر رہی تو اپوزیشن بھی کام نہیں کر رہی۔
شاہد خاقان عباسی کا یہ بھی کہنا ہے کہ جماعتیں ایک دن میں نہیں بنتیں سوائے ان کے جنہیں اسٹیبلشمنٹ بنائے، جس ملک میں قانون نہیں وہ ترقی نہیں کر سکتا۔
