بھارتی ریاست راجستھان میں بدنام زمانہ گینگسٹر لارنس بشنوئی اور اس کے نیٹ ورک کے خلاف پہلی بار باقاعدہ مقدمہ درج کر لیا گیا ہے۔ جے پور پولیس کے مغربی ضلع یونٹ نے ایف آئی آر درج کرتے ہوئے لارنس بشنوئی، روہت گوڈارا، امرجیت اور انمول بشنوئی سمیت کئی اہم ملزمان کو نامزد کیا ہے۔
پولیس نے گینگ کے 3 سرگرم ارکان بھوانی، سورج اور عمران کو بھی گرفتار کر لیا ہے۔ حکام کے مطابق یہ افراد طویل عرصے سے بشنوئی گینگ سے منسلک تھے اور سونے کی اسمگلنگ جیسے جرائم میں ملوث رہے ہیں۔
پولیس کا کہنا ہے کہ راجستھان میں گینگ سے منسلک کسی بھی فرد کو اب اسی کیس کے تحت فوری گرفتار کیا جا سکے گا۔
حکام کے مطابق یہ اقدام ریاست میں منظم جرائم کے پھیلاؤ کو روکنے اور بشنوئی گینگ کے اثر و رسوخ کو ختم کرنے کے لیے ایک پیشگی اور فیصلہ کن قدم ہے۔
واضح رہے کہ لارنس بشنوئی کا نام بالی ووڈ اداکار سلمان خان پر حملے کی سازش، سدھو موسے والا قتل کیس اور دیگر ہائی پروفائل جرائم سے جُڑا رہا ہے۔
