محکمۂ جنگلات و جنگلی حیات بلوچستان نے کوئٹہ کے نواحی علاقے میں کارروائی کرتے ہوئے نایاب جنگلی جانور، سلیمانی مارخور کے غیر قانونی شکار میں ملوث 4 افراد کے خلاف مقدمہ درج کرکے دو ملزمان کو گرفتار کر لیا۔
محکمۂ جنگلات و جنگلی حیات بلوچستان کے حکام کے مطابق کوئٹہ کے نواح میں واقع تکتو نیشنل پارک میں چند افراد کے نایاب جنگلی جانور سلیمانی مارخور کے غیر قانونی شکار میں ملوث ہونے کی اطلاعات ملی تھیں۔
یہ افراد وہاں مارخور کو ٹریپ کر کے ان کا غیرقانونی شکار کرتے تھے۔
اطلاعات پر کارروائی کرتے ہوئے اس میں ملوث 4 افراد کے خلاف مقدمہ درج کر لیا گیا ہے۔
حکام کے مطابق ملزمان محکمے کے اہلکاروں کو دھمکیاں دینے میں بھی ملوث پائے گئے ہیں، ملزمان سرکاری ملازم ہیں جن میں روزی خان، کلیم اللّٰہ، سیف اللّٰہ اور گوہر خان شامل ہیں۔
حکام کے مطابق ان میں سے دو ملزمان کو گرفتار کر لیا گیا ہے جبکہ باقی دو کی تلاش جاری ہے۔
دوسری جانب ملزمان کے خلاف محکمانہ کارروائی کا بھی آغاز کر دیا گیا ہے۔
واضح رہے کہ سلیمانی مارخور کا شمار قومی ورثہ قرار دیے جانے والے نایاب جانوروں میں ہوتا ہے، سلیمانی مارخور تکتو نیشنل پارٹی اور قریبی پہاڑوں پر پائے جاتے ہیں۔
