اسلام آباد:
رہنما مسلم لیگ (ن) رانا احسان افضل کا کہنا ہے کہ صدر ٹرمپ نے دکھاوے کیلیے اسرائیل کو برا بھلا کہا، یہ بات تو اب طے کہ ڈونلڈ ٹرمپ کی پریذیڈنسی اور اسرائیل کا جو تعلق ہے وہ بڑاگہرا ہے اور اس کیلیے امریکا اس جنگ میں بھی گھس گیاجس سے اس کا کوئی تعلق نہیں تھا، اس کو نہ مشتعل کیا گیا نہ کوئی تھریٹ تھی لیکن اس کے باوجود وہ جنگ میں شامل ہوا اور وہ کام کیا جو دنیا میں پہلے کبھی نہیں کیا گیا۔
ایکسپریس نیوز کے پروگرام کل تک میں گفتگو کرتے ہوئے انھوں نے کہا کہ آپ کر کیا رہے ہیں ، آپ ایٹمی تنصیبات پر بمباری کر رہے ہیں، اس کی پاکستان نے دوٹوک مذمت کی، ایٹمی تنصیبات پر حملے کے اثرات دنیا کیلیے بہت خطرناک ہو سکتے ہیں۔
ایرانی صحافی محمد حسین باقری نے کہاکہ درحقیقت جنگ بندی حیرت کی بات نہیں تھی جب ایران نے کل رات یا کل صبح ڈھائی بجے جوابی حملہ کر دیا ایک پیغام کے ساتھ تو ہمیں بھی یہ لگ رہا تھا کہ اس حملے کے بعد جنگ ختم ہونے والی ہے، اس کی دو اہم وجوہات ہیں جو انھوں نے ایران کے بارے میں مس کیلکولیشن کی تھی کہ 24گھنٹوں کے اندر ہم ان کے کمانڈروں کو شہید کریں گے جوہری سائنسدانوں کو ختم کریں گے اور بم گرنے کے بعد عوام سڑکوں پر آئیں گے وہ کامیابی انھیں حاصل نہیں ہوئی، میں سوچتا ہوں کہ یہ جنگ بندی نہیں ہے، اس کو ہمیں عارضی صلح کا نام دینا چاہیے، یہ صرف عارضی وقفہ ہے، میرا خیال ہے کہ یہ جنگ ابھی جاری ہے۔
(ر)ایئر کموڈورخالد چشتی نے کہا کہ دیکھنے کی اہم بات یہ ہے کہ جب جنگ شروع ہوتی ہے اور کوئی ملک اس کا آغاز کرتا ہے تو اس کے جنگ کے اہداف ہوتے ہیں یا انھوں نے پہلے سے حساب لگایا ہوتا ہے کہ ہم نے یہ حاصل کرنا ہے، پچھلے ہفتے جو پاکستان اور ہندوستان کی جو جنگ ہوئی تھی اس سے کو ریلیٹ کریں کہ جب اس نے ہم پہ یہ جنگ تھوپی تھی تو اس کا کیا وار اوبجیکٹیو تھا، وہ جنگی مقصد یہ تھا کہ پاکستان کو بین الاقوامی سطح پر غیر اہم بنا دیا جائے اور وہ اپنے آپ کو خطے میں امریکا کا پولیس مین ہونے کا اہل ثابت کرے، امریکا اور دیگر ممالک کی پشت پناہی سے 13تاریخ کو جب اسرائیل نے 200 جہازوں کے ساتھ ایران پر حملہ کیا تو ممکنہ طور پر اس کاجنگ مقصد یہی تھا کہ ایران کو بہت زیادہ نقصان پہنچایا جائے۔
