ثمر جعفری نے ابو الحسن اور فہد مصطفیٰ کے ساتھ کام کرنے کا تجربہ مداحوں کے ساتھ شیئر کردیا۔
پاکستانی ڈرامہ انڈسٹری کے اُبھرتے ہوئے نوجوان اداکار ثمر جعفری نے جیو پوڈکاسٹ میں شرکت کے دوران اپنے کیریئر، دوستوں اور فہد مصطفیٰ کے ساتھ کام کے تجربات پر کھل کر گفتگو کی۔
ثمر نے حالیہ انٹرویو میں انکشاف کیا کہ میری اور ابو الحسن کی اسکرین پر نظر آنے والی دوستی یعنی برومانس پہلی ملاقات میں ممکن نہ تھا۔
انہوں نے بتایا کہ میری ابو الحسن سے پہلی ملاقات ایک مشترکہ دوست کے ذریعے ہوئی تھی لیکن اُس وقت ابو الحسن کا موڈ اچھا نہیں تھا اور وہ تلخی سے پیش آئے، جس پر میں نے سوچا کہ شاید وہ مغرور یا بدتمیز ہیں۔
ان کا کہنا ہے کہ بعد میں جب ہم دونوں فہد مصطفیٰ کے دفتر میں دوبارہ ملے، تو ابو الحسن کا رویہ بالکل مختلف تھا، وہ دوستانہ انداز میں پیش آئے اور تب سے ہم دونوں کی دوستی گہری ہوگئی، جس کا اثر اسکرین پر بھی واضح نظر آتا ہے۔
ثمر جعفری نے انکشاف کیا کہ میرے دونوں بڑے پراجیکٹس معروف اداکار اور پروڈیوسر فہد مصطفیٰ کے بینر تلے بنے ہیں اور فلم نابالغ افراد میں فہد مصطفیٰ کے ساتھ کام کرنا میرے لیے کسی خواب کی تعبیر سے کم نہیں تھا۔
سمر کے مطابق برسوں پہلے میں ایک اشتہار میں فہد مصطفیٰ کے بچپن کا کردار ادا کر چکا ہوں، وقت کے ساتھ جب مجھے فلم میں فہد کے ساتھ کام کا موقع ملا، تو وہ لمحہ میرے لیے ایک خاص کامیابی تھا۔
