فہد شیخ نے فہد مصطفیٰ کی سب سے بڑی خامی سے پردہ اٹھا دیا۔
پاکستانی اداکار، ماڈل اور میزبان فہد شیخ کئی مقبول ڈراموں میں اپنی اداکاری کے جوہر دکھا چکے ہیں، حال ہی میں جیو ٹی وی کے مشہور شو ’ہنسنا منع ہے‘ میں میزبان تابش ہاشمی کے ساتھ گفتگو کرتے ہوئے نظر آئے۔
گفتگو کے دوران فہد شیخ نے انکشاف کیا کہ فہد مصطفیٰ میرے آل ٹائم فیورٹ اداکار ہیں بلکہ پاکستان کے اصل اسٹار بھی ہیں، تاہم انہوں نے پہلی بار فہد مصطفیٰ کی سب سے بڑی خامی کا بھی ذکر کیا۔
فہد شیخ نے بتایا، ’فہد بھائی جب غصے میں ہوتے ہیں تو خود پر قابو نہیں رکھ پاتے۔ انہوں نے ایک بار مجھے مشورہ دیا تھا کہ اگر غصہ آئے تو 24 گھنٹے انتظار کرو اور پھر ردعمل دو مگر وہ خود کبھی بھی یہ اصول اپنی زندگی میں نہیں اپناتے۔‘
یہ بیان مزاحیہ انداز میں دیا گیا لیکن اس میں ایک حقیقت بھی چھپی ہوئی تھی جسے ناظرین نے دلچسپی سے سنا۔
شو کے دوران یہ انکشاف سن کر ناظرین نے خوب داد دی، سوشل میڈیا پر بھی فہد شیخ کے اندازِ بیان اور کھلے دل سے سچ بولنے کی تعریف کی جا رہی ہے جبکہ فہد مصطفیٰ کے مداح بھی ان کے اس رویے کو مثبت انداز میں لے رہے ہیں۔
