وفاقی حکومت نے کے الیکڑک کے ٹیرف کے خلاف نیپرا میں نظر ثانی اپیل دائر کردی جس میں مختلف امور پر تبادلہ خیال کیا گیا ہے۔
وفاقی حکومت کی جانب سے نیپرا میں دائر کی جانے والی درخواست میں کہا گیا ہے کہ کے الیکڑک کو نیشنل گرڈ سے ملنے والی بجلی کی نسبت زیادہ ٹیرف دیاگیاہے، زیادہ ٹیرف دینے سے دو سال میں وفاق پر 59 ارب روپے کا بوجھ پڑے گا۔
وزارت توانائی نے کے الیکڑک کو ریکوری لاسز ٹیرف مِیں وصول کرنے پر بھی تحفظات کا اظہار کیا اور کہا ہے کہ ٹیرف سے سات سال میں صارفین پر200 ارب روپے کا بوجھ پڑے گا۔
درخواست میں کہا گیا ہے کہ کسی بھی بجلی کمپنی کو ایسا خصوصی الاؤنس نہیں دیا گیا جبکہ نیپرا نے نقصانات کی حد کے الیکڑک کی طلب سے زیادہ 90۔13 فیصد مقرر کیاہے۔
وزارت توانائی نے لا اینڈ آرڈر مارجن کی دو فیصد کا سپیشل مارجن دینے پر بھی تحفظات کا اظہار کیا اور کہا ہے کہ کے الیکڑک کو ڈالرز میں بارہ فیصد ریٹرن آن ایکویٹی دیا گیا ہے، اس اقدام کا ٹیرف پیریڈ کے دوران 37 ارب روپے کا اضافی بوجھ پڑے گا۔
درخواست میں کہا گیا ہے کہ کے الیکڑک کے پلانٹس کو کیپسٹی پیمنٹس کی اجازت سے 82 ارب روپے سے زائد کا بوجھ پڑے گا۔
وزارت توانائی نے کہا کہ نیپرا فیصلے سے کراچی کے بجلی صارفین کے بلوں میں بڑا اضافہ ہوگا اور کے الیکڑک کو ناجائز ٹریٹمنٹ دینے سے دوہرا سسٹم جنم لے گا۔
وفاقی حکومت نے تمام کمپنیوں کے ساتھ یکساں سلوک اختیار کرنے کی درخواست کی ہے۔
