بجٹ 26-2025ء کے حوالے سے پاکستان اور بین الاقوامی مالیاتی فنڈ (آئی ایم ایف) کے درمیان مذاکرات جاری ہیں۔
ذرائع کا کہنا ہے کہ حکومت نے آئی ایم ایف سے سپر ٹیکس میں کمی، ریئل اسٹیٹ کو ریلیف دینے کا مطالبہ کیا ہے، تنخواہ دار طبقے سمیت مختلف شعبوں کے لیے بھی حکومت کی جانب سے ریلیف مانگا جا رہا ہے، آئی ایم ایف نے تاحال کسی ممکنہ ریلیف پر انکار یا اقرار نہیں کیا ہے۔
ذرائع نے بتایا ہے کہ نئے مالی سال ایف بی آر کا سالانہ ٹیکس ہدف 2 حصوں پر مبنی ہو گا، حکومت نے آئی ایم ایف کو 14 ہزار ارب روپے سے زیادہ سالانہ ٹیکس ہدف مقرر کرنے کی تجویز دی ہے۔
ایف بی آر کے ذرائع نے بتایا ہے کہ آئی ایم ایف نے عدالتی کیسز سے حاصل ممکنہ ریونیو بھی مدِنظر رکھنے پر زور دیا ہے، مختلف عدالتوں میں ٹیکس سے متعلق 770 ارب کے مقدمات زیرِ التواء ہیں، 30 جون تک 250 ارب روپے کے کیسز کے فیصلے حق میں آنے کا امکان ہے، اگلے مالی سال کم از کم 500 ارب روپے مالیت کے مقدمات کے فیصلے متوقع ہیں۔
ذرائع کے مطابق حکومت نے آئی ایم ایف سے سپر ٹیکس کی شرح میں کمی کا مطالبہ کر دیا ہے، ریئل اسٹیل، پراپرٹی، تعمیراتی شعبے کے لیے بھی ریلیف مانگا ہے، معاشی ٹیم کی آئی ایم ایف کے ساتھ تاحال کسی ریلیف پر انڈراسٹینڈنگ نہیں ہو سکی ہے۔
ذرائع کا کہنا ہے کہ حکومت آئی ایم ایف کے ساتھ معاہدے کی پابند ہے، فیصلے رضامندی سے ہوں گے، آئی ایم ایف نے ریلیف اقدامات کی درخواست پر کوئی مؤقف اختیار نہیں کیا ہے۔
ایف بی آر کے ذرائع نے بتایا ہے کہ پاکستان نے معاشی بحالی کے لیے مختلف شعبوں کے لیے ٹیکس رعایتیں مانگی ہیں، آئی ایم ایف ٹیکس رعایت پر ڈیٹا اور حکمتِ عملی دیکھ کر فیصلہ کرے گا، ابھی آئی ایم ایف ہر چیز کا ڈیٹا مانگ رہا ہے جو معاشی ٹیم فراہم کر رہی ہے۔
ذرائع کا کہنا ہے کہ آئی ایم ایف کی ٹیم کے ڈیٹا پر سوالات کے جوابات دیے جا رہے ہیں، فی الحال آئی ایم ایف کے ساتھ کوئی نئی شرائط بھی طے نہیں ہو سکیں، آئی ایم ایف نے صوبوں کے اخراجات کم کرنے اور آمدن بڑھانے کا مطالبہ کیا ہے، آئی ایم ایف نے زرعی انکم ٹیکس وصولی کے لیے اقدامات لینے کا مطالبہ بھی کیا ہے۔
