پاکستان شوبز انڈسٹری کی سینئر اداکارہ نادیہ جمیل نے بیٹوں کی اچھی تربیت کرنے پر زور دیتے ہوئے مشورہ دیا ہے کہ والدین بہو پر نظر رکھنے کے بجائے بیٹے پر نظر رکھیں۔
نادیہ جمیل نے حال ہی میں ایک انٹرویو کے دوران بتایا کہ میرے بیٹے کی بات پکی ہونے والی ہے اور اگلے سال انشاءاللّٰہ اس کی شادی ہے تو جب میرے گھر میں بہو آئے گی تو یہ میری ذمہ داری ہوگی کہ گھر میں بہو کے ساتھ کوئی بھی ناانصافی نہ ہو۔
اُنہوں نے کہا کہ میری نظر چیل کی طرح بہو کے بجائے بیٹے پر ہوگی کہ کہیں میرا بیٹا بہو کو نئے گھر میں تکلیف تو نہیں دے رہا، کہیں اسے کم تر محسوس تو نہیں کروا رہا۔
اداکارہ نے کہا کہ بہو گھر میں مہمان نہیں ہوتی بلکہ وہ اس کا اپنا گھر ہوتا ہے تو یہ ساس کا کام ہوتا ہے کہ جب وہ گھر میں بہو لائے تو اسے گھر میں اپنا پن محسوس کروائے۔
اُنہوں نے کہا کہ ہمارے معاشرے میں ماؤں میں اس بات کی آگاہی پیدا کرنا بہت اہم ہے کہ اپنے بیٹوں کی اچھی تربیت کریں اور اُنہیں یہ سکھائیں کہ عورت کی آزادی اس کا حق ہے جو پہلے اللّٰہ نے عورت کے والد کے ہاتھ میں امانت کے طور پر دی تھی اور شادی کے بعد اب شوہر کا فرض ہے کہ اس امانت کی حفاظت کرے۔
نادیہ جمیل نے کہا کہ ماؤں کو اپنے بیٹوں کو یہ سکھانا چاہیے کہ بیوی کے ساتھ اس طرح کا رشتہ بنائیں کہ ہر موضوع پر آپس میں مشورہ کرکے آگے بڑھیں۔
