اسلام آباد:
وزیرِ اعظم شہباز شریف نے چیف آف آرمی اسٹاف جنرل سید عاصم منیر کو فیلڈ مارشل کے عہدے پر ترقی ملنے دلی مبارک باد دی ہے۔
وزیراعظم آفس سے جاری بیان کے مطابق وزیراعظم شہباز شریف نے کہا کہ آرمی چیف نے معرکہ حق کے دوران آپریشن بنیان مرصوص میں اپنی قائدانہ اور پیشہ ورانہ صلاحیتوں سے دشمن کے ناپاک عزائم کو خاک میں ملایا۔
انہوں نے کہا کہ جنرل عاصم منیر کو اللہ تعالٰی نے بے مثال خوبیوں سے نوازا ہے، آپریشن بنیان مرصوص کی کامیابی میں ان کی دلیری، استقامت اور دانش مندی کا کلیدی کردار تھا۔
ان کا کہنا تھا کہ آرمی چیف کی دفاع وطن کے لیے گراں قدر خدمات اور آپریشن بنیان مرصوص کے ذریعے خطے میں طاقت کے توازن کو قائم کرنے کے لیے اقدامات پر انہیں فیلڈ مارشل کے عہدے پر ترقی دی گئی ہے۔
وزیرِ اعظم نے کہا کہ معرکہ حق کے دوران آرمی چیف سے لے کر سرحدوں پر دشمن کی جارحیت کا منہ توڑ جواب دینے والے ہر سپاہی نے دفاع وطن کے لیے دلیری سے اپنی خدمات سر انجام دیں۔
ان کا کہنا تھا کہ مجھ سمیت پوری قوم کو آرمی چیف جنرل عاصم منیر اور ان کی قیادت میں اپنی بہادر افواج کے غازیان و شہدا اور ان کے اہل خانہ پر فخر ہے۔
