سابق وزیر صنعت و تجارت ہمایوں اختر کا کہنا ہے کہ پاکستان کے لیے سب سے بڑا سورس آف ریوینیو انڈسٹری ہے، ریوینیو بڑھانے کےلیے صنعتوں کو فعال کرنا پڑے گا۔
جیو پاکستان میں ہمایوں اختر خان نے گفتگو کرتے ہوئے کہا کہ اگر ہمیں ریوینیو بڑھانا ہے تو صنعتوں کو فعال کرنا پڑے گا، جو انڈسٹریز خسارے میں ہیں ان کو پرائیویٹائز کیا جائے۔
ان کا کہنا ہے کہ بجلی کے ریٹ بہت زیادہ بڑھ چکے ہیں، انڈسٹریز کو چلانے کے لیے قرضے چاہیے ہوتے ہیں۔ اسٹیٹ بینک کی رپورٹ کے مطابق اس میں کمی آئی ہے۔ ملک میں کاسٹ آف ڈوئنگ بزنس بڑھ گئی ہے، پاکستانی بینکاری نظام کا بڑا حصہ حکومت چلانے پر جا رہا ہے۔
انہوں نے کہا کہ ملک میں معاشی استحکام آچکا ہے جبکہ بجلی کے ٹیرف انتہائی پیچیدہ معاملہ ہے۔
ہمایوں اختر کے مطابق سولر کا استعمال بڑھنے سے نیشنل گرڈ سے بجلی کی کھپت کم ہوجاتی ہے، ٹیرف وار کافی حد تک ختم ہوچکی ہے۔ آئی ٹی سیکٹر میں کافی پیش رفت ہوسکتی ہے۔
ان کا کہنا تھا کہ میرے خیال میں امریکا پاکستان کے ساتھ فری ٹریڈ پالیسی کےلیے تیار ہے، ملک میں صنعت کا شعبہ سکڑ رہا ہے، ملک کی ایکسپورٹ بڑھانے اور امپورٹس کم کرنے پر توجہ دینے کی ضرورت ہے۔
