(24 نیوز)وزارت صنعت و پیداوار کے موثر ادارے انجینئرنگ ڈویلپمنٹ بورڈ (ای ڈی بی) نے 2030 تک مکمل تیار شدہ (سی بی یو) گاڑیوں پر درآمدی ڈیوٹی کم کر کے 15 فیصد کرنے کا انکشاف کرکے کار ساز اداروں کو حیرت میں مبتلا کردیا ہے۔
رپورٹ کے مطابق پاکستان آٹوموٹو مینوفیکچررز ایسوسی ایشن (پاما) کے ڈائریکٹر جنرل عبد الواحد خان نے کہا کہ ای ڈی بی نے گزشتہ کسی بھی اجلاس میں سی بی یو گاڑیوں پر ڈیوٹی سے متعلق کوئی بات ظاہر نہیں کی تھی، اس وقت مختلف سی بی یو گاڑیوں پر درآمدی ڈیوٹی 100 فیصد ہے۔
انہوں نے تفصیلات بتاتے ہوئے کہا کہ ای ڈی بی نے آٹو انڈسٹری کے شراکت داروں کے ساتھ آئندہ ٹیرف تجاویز پر ایک طویل میٹنگ کی اور آٹو انڈسٹری کو ہدایت کی کہ وہ 13 مئی تک اپنی رائے جمع کروائیں۔
یہ بھی پڑھیں:بنگلہ دیش کی کرکٹ ٹیم پاکستان آئے گی یا نہیں ؟ اہم خبر آ گئی ۔۔۔۔۔
پاما نے 14 مئی تک اپنی رائے جمع کرا دی، اور اسمبلرز نے یہی سمجھا کہ رسمی مشاورتی عمل مکمل ہو چکا ہے۔
ایک غیر متوقع اور تشویشناک پیشرفت میں انجینئرنگ ڈویلپمنٹ بورڈ نے 15 مئی کو ایک اور اجلاس طلب کیا، جس میں مستقبل میں مکمل تیار شدہ (سی بی یو) گاڑیوں پر درآمدی ڈیوٹی 15 فیصد مقرر کرنے کا عندیہ دیا گیا۔
