کراچی (اسٹاف رپورٹر) بھارتی کرکٹ بورڈ کے سیکریٹری دیو جیت سائیکیا نے کہا ہے کہ بھارت نے ایشیا کپ سمیت ایشین کرکٹ کونسل کے ایونٹس سے دستبرداری کافی الحال کوئی فیصلہ نہیں کیا اور نہ ہی اس حوالے سے کوئی بات چیت ہوئی ہے۔ پیر کو میڈیا رپورٹس کے ردعمل میں انہوں نے کہا کہ ایشیائی کرکٹ مقابلوں میں شرکت نہ کرنے کی خبریں صبح سے سن رہا ہوں، یہ محض قیاس آرائی اور خیالی ہے، ان خبروں میں اس وقت کوئی سچائی نہیں، اس وقت ہماری پوری توجہ آئی پی ایل اور انگلینڈ سے سیریز پر ہے، اے سی سی ایونٹس سے متعلق بات چیت کے بعد کوئی فیصلہ ہوا تو بورڈ اس کا اعلان کرے گا۔ اب تک بی سی سی آئی نے نہ ہی اس موضوع پر کوئی بات چیت کی ہے اور نہ ہی اے سی سی کو کسی قسم کا خط لکھا ہے۔ واضح رہے کہ بھارتی اخبار نے بھارت کے ایشیا کپ کرکٹ سے دستبرداری کے فیصلے کی خبر شائع کی تھی، بھارتی اخبار نے نام کے بغیر ایک بھارتی آفیشل کے حوالے سے رپورٹ کیا تھا کہ ایشین کرکٹ کونسل کے صدر، چیئرمین پی سی بی محسن نقوی ہیں، بھارتی ٹیم ایک ایسے ٹورنامنٹ میں نہیں کھیل سکتی جس کے سربراہ پاکستان کے وزیر ہیں۔ ایشیا کپ رواں سال ستمبر میں بھارت میں شیڈول ہے۔
