حج کی ادائیگی کے جذبے نے پہاڑ جیسے فاصلے مٹا دیے، بیلجیئم سے نوجوان طویل اور ہزاروں کلو میٹر پر محیط سفر طے کر کے سائیکل پر سعودی عرب پہنچ گیا۔
رمضان کے بابرکت مہینے میں جب لوگ عبادات میں مصروف تھے، بیلجیم کے 26 سالہ نوجوان انَس الرزقی نے ایک منفرد اور عظیم سفر کا آغاز کیا، سائیکل پر مکہ مکرمہ تک کا 4 ہزار 500 کلومیٹر طویل سفر ادائیگی حج کےلیے ادا کیا۔
انَس الرزقی نے بتایا کہ میں نے یہ سفر رمضان المبارک میں روزے کی حالت میں شروع کیا اور روزانہ تقریباً 100 کلو میٹر سائیکل چلائی۔
انہوں نے یورپ سے مشرقِ وسطیٰ تک 13 ممالک کا سفر کیا، جس میں جرمنی، بوسنیا، ترکی، اردن اور آخر میں سعودی عرب شامل ہیں۔
انَس نے انٹرویو میں کہا کہ یہ ایک خواب ہے، ایک نعمت ہے، سفر کے دوران میں نے مساجد میں رات بسر کی۔
ان کا کہنا تھا کہ یہ سفر آسان نہیں تھا، لیکن ایمان، جذبے اور صبر کے ساتھ ہر مشکل کو عبور کرتا گیا۔
جب انَس سعودی عرب پہنچے تو حلّت عمار بارڈر پر ان کا پھولوں اور عربی قہوے سے استقبال کیا گیا، وہ حج پرمٹ کا بیج پہن کر بارڈر سیکیورٹی اہلکاروں کے ساتھ دستاویزات مکمل کرتے نظر آئے۔
