(24 نیوز)آج 17 مئی 2025 کو پاکستان سمیت دنیا بھر میں ہائی بلڈ پریشر کا عالمی دن منایا جا رہا ہے، اس سال کا موضوع ہے: “اپنا بلڈ پریشر درست طریقے سے ناپیں، اسے قابو میں رکھیں، اور لمبی زندگی گزاریں!”۔
ہائی بلڈ پریشر کے عالمی دن کا مقصد ہائی بلڈ پریشر کی بروقت تشخیص اور مؤثر کنٹرول کی اہمیت کو اجاگر کرنا ہے۔
ہائی بلڈ پریشر کو اکثر “خاموش قاتل” کہا جاتا ہے کیونکہ یہ بغیر کسی واضح علامات کے دل، دماغ، گردوں اور دیگر اعضاء کو نقصان پہنچا سکتا ہے۔
عالمی ادارہ صحت کے مطابق، دنیا بھر میں 1.13 ارب سے زائد افراد ہائی بلڈ پریشر کا شکار ہیں، جن میں سے بہت سے افراد اس سے لاعلم ہیں ۔
پاکستان میں ہائی بلڈ پریشر ایک سنگین مسئلہ ہے،ماہرین صحت کے مطابق، نوجوانوں میں بھی ہائی بلڈ پریشر ہے جو کہ طرزِ زندگی میں تبدیلیوں، ذہنی دباؤ، اور غیر صحت بخش خوراک کا نتیجہ ہے ۔
بلڈ پریشر کو قابو میں رکھنے کیلئے ماہرین درج ذیل اقدامات کی تجویز دیتے ہیں:
صحت مند وزن برقرار رکھیں: جسمانی وزن کو مناسب حد میں رکھنا دل پر دباؤ کم کرتا ہے۔
متوازن غذا اپنائیں: پھل، سبزیاں، کم چکنائی والی ڈیری مصنوعات، اور کم نمک والی غذا کا استعمال کریں۔
روزانہ ورزش کریں: روزانہ کم از کم 30 منٹ کی جسمانی سرگرمی بلڈ پریشر کو قابو میں رکھنے میں مددگار ہے۔
تمباکو نوشی اور الکحل سے پرہیز کریں: یہ دونوں عوامل بلڈ پریشر کو بڑھا سکتے ہیں۔
ذہنی دباؤ کو کم کریں: یوگا، گہری سانسیں، اور مراقبہ جیسے طریقے ذہنی سکون فراہم کرتے ہیں ۔
