(ویب ڈیسک)سعودی عرب میں مسجد نبویؐ میں عازمین حج کی سہولت کے لیے مصنوعی ذہانت پر مبنی “سمارٹ معاون” ایپ لانچ کردی گئی۔
سعودی خبر رساں ادارے کی رپورٹ کے مطابق یہ ایپ ادارہ امورحرمین شریفین میں دینی شعبے کے سربراہ شیخ عبدالرحمن السدیس کی جانب سے متعارف کروائی گئی ہے،اس موقع پر شیخ السدیس کے ہمراہ امام و خطیب مسجد نبویؐ شیخ ڈاکٹر عبدالباری بن عواض الثبیتی بھی موجود تھے۔
یاد رہے کہ ادارہ حرمین کے شعبہ دینی امور کی جانب سے حج آپریشنل پلان جاری کردیا گیا ہے جو 120 اقدامات پر مشتمل ہے اس کا مقصد عازمین حج کی بہتر رہنمائی کرنا ہے,عازمین حج کی سہولت کیلیے متعدد زبانوں میں ڈیجیٹل رہنما ضوابط بھی جاری کیے گئے ہیں۔
روبوٹس “منارہ” کے دوسرے ورژن کو متعارف کرایا گیاہے جو گزشتہ برس سے اپ ڈیٹ ہے ،اس میں مزید زبانوں کا بھی اضافہ کیا گیا ہے،اس کے علاوہ عازمین کے لیے 50 علمی و فکری پروگراموں کا بھی اہتمام کیا گیا ہے۔
دوسری جانب سعودی عرب میں رائل کمیشن برائے مکہ مکرمہ اور مشاعر مقدسہ نے کہا ہے کہ حج 1446 ہجری کے لیے عازمینِ حج کی خدمت کے حوالے سے شروع کیے جانے والے منصوبوں پر کام مکمل کر لیا گیا ہے،مکہ مکرمہ کے مرکزی علاقے میں پیدل چلنے والوں کی سہولت کے لیے ٹریکس کو کشادہ کیا گیاہے جبکہ بھیڑ کو کنٹرول کرنے کیلیے بھی جامع حکمت عملی ترتیب دی گئی ہے۔
رپورٹس کے مطابق حج آپریشنل پلان کے تحت “مکہ بس” پروگرام کا بھی باقاعدہ آغاز ہوچکا ہے، جس کے تحت مکہ مکرمہ میں 400 بسوں کی سہولت فراہم کی گئی ہے جو 12 راستوں کے لیے مخصوص ہیں۔
سعودی عرب میں حجاج کرام کی سہولت اور سلامتی کے لیے مشاعر مقدسہ (وادی منی، مزدلفہ اور عرفات) میں بھی ترقیاتی منصوبوں پر کام کیا گیا جن کے تحت مزدلفہ میدان میں ایک لاکھ 70 ہزار مربع میٹر پر مخصوص ٹریک تعمیر کیا گیا ہے جسے “نرم راستے” کا نام دیا گیا ہے،اس کے علاوہ منیٰ کی وادی میں امور صحت کے حوالے سے 200 بستروں پر مشتمل ہسپتال جبکہ 71 طبی مراکز بھی قائم کیے گئے ہیں جہاں طبی عملہ ایام حج میں مستقل طورپر فعال رہے گا۔
یہ بھی پڑھیں:سندھ بجٹ کی تیاریاں، سرکاری ملازمین کی تنخواہوں میں 20 فیصد اضافہ متوقع
حجاج کے آرام کے پیش نظر مشاعر مقدسہ میں مختلف مقامات پر سائے کا انتظام بھی کیا گیا ہے،اس کے علاوہ پینے کے پانی کی مستقل فراہمی کو یقینی بناتے ہوئے متعدد مقامات پر 400 واٹرکولرز بھی لگائے گئے ہیں۔
