پاکستان ڈرامہ انڈسٹری کی اداکارہ ثناء عسکری نے بھارت میں پاکستانی اداکاراؤں پر پابندی کے باوجود بالی ووڈ میں کام کرنے کے خواہاں فنکاروں کو آڑے ہاتھوں لیا ہے۔
اداکارہ ثناء نے حال ہی میں ڈیجیٹل پلیٹ پر ایک پوڈکاسٹ میں گفتگو کرتے ہوئے پاکستان میں خواتین کو ملنے والی آزادی، حقوق، گھریلو و پیشہ ور خواتین کے کمانے کےلیے گھر سے نکلنے سمیت دیگر مسائل پر کھل کر بات کی۔
ثناء عسکری نے ایک سوال کے جواب میں کہا کہ مجھے سمجھ نہیں آتی کہ پابندی کے باوجود پاکستانی فنکار بھارت کیوں دوڑے چلے جاتے ہیں؟
اداکارہ نے پاکستان کے معروف، خوبرو اداکار و ماڈل فواد خان کا نام لیتے ہوئے کہا کہ انہوں نے بھی حال ہی میں بھارت میں کام کیا مگر ان کی فلم پر پابندی لگ گئی ہے۔
انہوں نے مزید کہا کہ جہاں آپ کو اور آپ کے کام کو عزت ملے وہیں پر فنکاروں کو کام کرنا چاہیے، بھارت چھینک مارنے کے لیے بھی بلاتا ہے تو پاکستانی فنکار دوڑے چلے جاتے ہیں۔
جیو انٹرٹینمنٹ کے مشہور ڈرامہ سیریل ’بجو‘ کی اداکارہ ثناء عسکری کا کہنا ہے اگر بھارت آپ کو عزت سے بلائے تو عزت سے جانا چاہیے، اگر وہ آپ کو عزت نہیں دے پا رہے تو آپ کو اپنے ملک میں ہی رہتے ہوئے کام کرنا چاہے۔
اداکارہ نے اپنی رائے کا اظہار کرتے ہوئے مزید کہا کہ میرے خیال میں یہ سلسلہ دو طرفہ ہونا چاہیے، اگر آپ جا رہے ہیں تو بھارتی فنکاروں کو بھی پاکستان آنا چاہیے۔
اداکارہ ثناء عسکری کے اظہارِ خیال پر مبنی یہ ویڈیو کلپ سوشل میڈیا پر وائرل ہو گیا ہے جسے صارفین کی جانب سے سراہا جا رہا ہے۔
