امریکا کی معروف اداکارہ ایمبر ہرڈ نے ماؤں کے عالمی دن کے موقع پر اپنے یہاں جڑواں بچوں کی پیدائش سے متعلق انکشاف کیا ہے۔
اداکارہ نے اپنے فوٹوز اینڈ ویڈیوز شییئرنگ ایپ اکاؤنٹ انسٹاگرام پر نئی پوسٹ شیئر کی جس میں ان کے، اور دو نومولود بچوں کے پاوؤں کو دیکھا جا سکتا ہے۔
اداکارہ نے اپنی اس پوسٹ کے طویل کیپشن میں لکھا ہے کہ ’مدرز ڈے 2025ء میں کبھی نہیں بھولوں گی، اس سال میں نے اپنے خاندان کی تکمیل کی ہے جسے میں نے برسوں سے تعمیر کرنے کی کوشش کی تھی۔
انہوں نے مزید لکھا کہ میں آج باضابطہ طور پر اس خبر کا اعلان کرتی ہوں کہ میں نے ہرڈ گینگ میں جڑواں بچوں کو خوش آمدید کہا ہے، میری بیٹی ’ایگنس‘ اور میرے بیٹا ’اوشین‘ نے میرے ہاتھ اور میرے دل کو خوشی سے بھر دیا ہے۔
ایمبر ہرڈ کا اپنی پوسٹ میں بتانا تھا کہ چار سال قبل جب میری پہلی بیٹی ’اوناگ‘ نے جنم لیا تو میری دنیا ہمیشہ کےلیے بدل گئی تھی، میں ہمیشہ کے لیے شکر گزار ہوں کہ میں نے اس خوشی کا انتخاب ذمہ داری اور سوچ سمجھ کر کیا۔
ایمبر ہرڈ نے اپنی اس پوسٹ میں دنیا کی تمام ماؤں کو خراجِ تحسین پیش کرتے ہوئے اس دن کی مبارکباد دی۔
اداکارہ نے اپنی اس پوسٹ کا کمنٹ باکس بلاک کر رکھا ہے۔
اداکارہ ایمبر ہرڈ معروف امریکی اداکار جونی ڈیپ کی سابقہ اہلیہ ہیں، ہالی ووڈ کی اس جوڑی کی شادی 2015ء میں ہوئی تھی جو زیادہ عرصہ نہ چل سکی اور 2017ء میں اس جوڑی کے درمیان باقاعدہ طور پر طلاق ہوگئی تھی۔
بعد ازاں اداکارہ ایمبر ہرڈ نے جونی ڈیپ پر گھریلو تشدد کا الزام لگاتے ہوئے مقدمہ دائر کیا تھا جسے اداکار جانی ڈیپ نے ایک لمبے عدالتی ٹرائل کے بعد جیت لیا تھا۔
