(24 نیوز)لاہور کے علاقے شاد باغ میں پولیس نے کامیاب کارروائی کرتے ہوئے مرد و زن پر مشتمل چار رکنی موٹر سائیکل چور گینگ گرفتار کر لیا۔
ملزمان کو سی سی ٹی وی فوٹیج میں موٹر سائیکل چوری کرتے دیکھا جا سکتا ہے۔ ملزمان گلی محلوں اور بازاروں میں کھڑی موٹر سائیکل کو ماسٹر چابیوں سے کھول کر فرار ہو جاتے۔
پولیس چیکنگ سے بچنے کے لیے ملزمہ موٹر سائیکل پر ساتھ سوار ہو جاتی اور وارادت کے بعد ملزمان خاتون ساتھی کے ہمراہ موٹر سائیکل فروخت کر دیتے۔
ملزمان نے چند روز قبل سی سی ٹی وی کیمروں کے سامنے سے موٹر سائیکل چوری کی تھی۔
ایس پی سٹی بلال احمد کے مطابق ملزمان کے قبضے سے 5 موٹر سائیکل، 6 موبائل، نقد رقم، اسلحہ اور ماسٹر چابیاں برآمد کی گئیں۔ گرفتار ملزمان میں عادل، عثمان، شہباز اور عائشہ بی بی شامل ہے جن کے خلاف مقدمات درج کرکے تفتیش جاری ہے۔
ایس پی سٹی نے اسٹریٹ کرائم کرنے والے متحرک گینگ کی گرفتاری پر ایس ایچ او شاد باغ محمد شہریار، سب انسپکٹر عمران اور ٹیم کو شاباش دی۔ انہوں نے کہا کہ انسداد جرائم کے حوالے سے کڑی نگرانی کی جا رہی ہے۔
یہ بھی پڑھیں :وزیراعظم محمد شہباز شریف سے کویتی سفیر کی ملاقات
