اسرائیل کے غزہ میں توسیعی آپریشن منصوبے کی فرانس اور یورپی یونین نے شدید مذمت کی ہے۔
غیر ملکی خبر ایجنسی کے مطابق فرانسیسی وزیرِخارجہ کا کہنا ہے کہ اسرائیلی منصوبہ ناقابلِ قبول ہے، اسرائیلی حکومت انسانی قوانین کی خلاف ورزی کر رہی ہے۔
خبر ایجنسی کے مطابق یورپی یونین نے بھی اسرائیل کےغزہ پر نئے آپریشن کے منصوبے پر تشویش کا اظہار کیا ہے۔
یورپی یونین نے مطالبہ کیا ہے کہ اسرائیل غزہ سے ناکہ بندی ختم کرے تاکہ انسانی امداد کی فراہمی ممکن ہو، تمام جارحیت کے خاتمے اور یرغمالیوں کی رہائی کا واحد راستہ مذاکرات ہیں۔
واضح رہے کہ گزشتہ روز اسرائیلی وزیرِ اعظم نیتن یاہو نے فلسطینیوں کو غزہ سے بے دخل کرنے کا اعلان کیا تھا۔
اپنے بیان میں اسرائیلی وزیراعظم نے کہا تھا کہ غزہ میں شروع ہونے والی کارروائی شدید ہو گی، غزہ کی آبادی کو اس کے تحفظ کے لیے ہٹایا جائے گا۔
اسرائیلی وزیرِ اعظم نیتن یاہو نے یہ بھی کہا تھا کہ اسرائیلی فوج غزہ میں کارروائی کرے اور واپس آ جائے، ایسا نہیں، بلکہ اس کے برعکس ہو گا۔
