پاکستان کے مشہور پاپ گلوکار فلک شبیر نے حال ہی میں سوشل میڈیا پر ایسا بیان جاری کیا کہ جسے مداحوں نے براہِ راست عاطف اسلم پر طنز قرار دیا ہے۔
فلک نے بغیر کسی کا نام لیے کہا کہ کچھ گلوکار نصرت فتح علی خان کی مشہور قوالیوں پر انحصار کر رہے ہیں اور نیا اور اصلی کام کرنے سے گریزاں ہیں۔
فلک شبیر نے انسٹاگرام اسٹوری پر لکھا کہ خان صاحب کو ان کی آخری آرام گاہ میں تو آرام کرنے دیں پلیز اور کچھ نیا کام کریں۔
اگرچہ فلک نے کسی کا نام نہیں لیا، مگر مداحوں نے فوری طور پر اسے عاطف اسلم کی حالیہ قوالی ری کریئشن سے جوڑ دیا، جس میں انہوں نے نصرت فتح علی خان کی مشہور قوالی کو نئے انداز میں پیش کیا تھا۔
سوشل میڈیا پر فالوورز کے درمیان بحث چھڑ گئی ہے، کچھ صارفین فلک کی بات سے متفق ہیں جبکہ دیگر نے اسے جیلسی یا پبلسٹی اسٹنٹ قرار دیا ہے۔
ایک صارف نے لکھا کہ عاطف اسلم نے قوالی کو خراب نہیں کیا، بلکہ نئی نسل تک پہنچایا ہے، ایک اور نے کہا کہ کاش فلک شبیر پہلے خود کوئی لیجنڈری لیول کا کام کر لیتے، جبکہ کسی نے کہا کہ نصرت صاحب کے اصل کام کو چھوڑ کر سب کاپی پیسٹ کر رہے ہیں۔
یاد رہے کہ عاطف اسلم نے حالیہ دنوں میں نصرت فتح علی خان کی قوالیوں کو ایک جدید انداز میں پیش کیا تھا۔
