پاکستان کرکٹ بورڈ (پی سی بی) نے بنگلا دیش کرکٹ ٹیم کے خلاف دو اضافی مینز ٹی ٹوئنٹی انٹرنیشنل میچوں کی تصدیق کر دی۔
پاکستان اور بنگلادیش آئی سی سی مینز ٹی ٹوئنٹی ورلڈ کپ کی تیاری کے لیے 5 ٹی ٹوئنٹی میچز کھیلیں گے۔
فیصل آباد 17 سال بعد ایک بار پھر بین الاقوامی کرکٹ کی میزبانی کرے گا۔
یہ سیریز فیوچر ٹور پروگرام (ایف ٹی پی) کا حصہ ہے جو دراصل 3 ون ڈے اور 3 ٹی ٹوئنٹی انٹرنیشنل میچوں پر مشتمل تھی تاہم آئندہ سال آئی سی سی مینز ٹی ٹوئنٹی ورلڈ کپ کے پیش نظر دونوں کرکٹ بورڈز نے باہمی طور پر ون ڈے میچوں کی جگہ 2 اضافی ٹی ٹوئنٹی انٹرنیشنل کھیلنے پر اتفاق کیا ہے۔
پانچ میچوں کی ٹی ٹوئنٹی سیریز 25 مئی سے 3 جون تک فیصل آباد اور لاہور میں کھیلی جائے گی۔
فیصل آباد کا اقبال اسٹیڈیم جس نے گزشتہ سال ستمبر میں افتتاحی چیمپئنز ون ڈے کپ اور گزشتہ ماہ نیشنل ٹی ٹوئنٹی کپ کی کامیابی کے ساتھ میزبانی کی، سیریز کے پہلے اور دوسرے ٹی ٹوئنٹی کی میزبانی بالترتیب 25 اور 27 مئی کو کرے گا۔
اقبال اسٹیڈیم فیصل آباد جو اس سے قبل 1978ء سے 2008ء کے درمیان 24 ٹیسٹ اور 16 ون ڈے میچوں کی میزبانی کر چکا ہے، 17 سال کے وقفے کے بعد بین الاقوامی کرکٹ کی واپسی کو خوش آمدید کہے گا۔
اس اسٹیڈیم میں آخری بین الاقوامی میچ اپریل 2008ء میں بنگلادیش اور پاکستان کے درمیان کھیلا گیا تھا۔
لاہور کا قذافی اسٹیڈیم 30 مئی، یکم جون اور 3 جون کو بقیہ 3 ٹی ٹوئنٹی میچوں کی میزبانی کرے گا۔
بنگلا دیشی ٹیم 21 مئی کو پاکستان پہنچے گی اور 22 سے 24 مئی تک اقبال اسٹیڈیم میں تربیتی سیشن کرے گی۔
پاکستان بنگلا دیش سیریز کا شیڈول
21 مئی کو بنگلادیش کی ٹیم کی آمد۔
25 مئی کو پہلا ٹی ٹوئنٹی انٹرنیشنل۔اقبال اسٹیڈیم فیصل آباد۔
27 مئی کو دوسرا ٹی ٹوئنٹی انٹرنیشنل۔اقبال اسٹیڈیم فیصل آباد۔
30 مئی کو تیسرا ٹی ٹوئنٹی انٹرنیشنل۔قذافی اسٹیڈیم لاہور۔
یکم جون کو چوتھا ٹی ٹوئنٹی انٹرنیشنل۔قذافی اسٹیڈیم لاہور۔
3 جون کو پانچواں ٹی ٹوئنٹی انٹرنیشنل۔قذافی اسٹیڈیم لاہور
