(روزینہ علی) اسلام آباد، لاہور سمیت پنجاب، خیبرپختونخوا اور گلگت کے مختلف علاقوں میں زلزلے کے شدید جھٹکے محسوس کئے گئے،لوگ کلمہ طیبہ کا ورد کرتے ہوئے گھروں سے نکل آئے۔
لاہوراوراسلام آباد سمیت مختلف شہروں میں زلزلے کے جھٹکے محسوس کئے گئے،پشاور،مردان ،کوہاٹ ، لوئر دیر اور چترال میں بھی زلزلے کے جھٹکوں کے بعدلوگوں میں خوف و ہراس پھیل گیا اوروہ کلمہ طیبہ کا ورد کرتے ہوئے گھروں اوردفاتر سے باہر نکل آئے۔
مالاکنڈ، ایبٹ آباد،راولپنڈی، دیر بالا، ہری پور، خان پور، ٹیکسلا اور چنیوٹ میں بھی زلزلے کے شدید جھٹکے محسوس کیے گئے۔
خیبر، شرقپور، پنڈ دادنخان، فیصل آباد، گلگت بلتستان ، نوشہرہ ،چارسدہ اور خوشاب میں بھی زلزلہ محسوس کیا گیا۔
یہ بھی پڑھیں:پاک فوج نے کردار، جرأت اور قابلیت کی بھرپور صفات کو برقرار رکھا ہے: آرمی چیف
زلزلہ پیما مرکز کے مطابق ریکٹر اسکیل پر زلزلے کی شدت 5.9 اور گہرائی 94 کلو میٹر ریکارڈ کی گئی جبکہ اس کا مرکز تاجکستان اور افغانستان کا سرحدی علاقہ تھا۔
ڈی جی پی ڈی ایم اے کا کہنا ہے کہ پنجاب بھر کی انتظامیہ عمارتوں کی چیکنگ میں مصروف ہے، زلزلے کے آفٹر شاکس سے پیدا ہونیوالی صورتحال سے نمٹنے کیلئے مشینری اور عملے کو الرٹ کردیا گیا، کنٹرول روم سمیت پنجاب بھر کے ڈسٹرکٹ ایمرجنسی آپریشن سینٹرز فعال ہیں۔
ترجمان پی ڈی ایم اے کا کہنا ہے کہ زلزلے سے نقصانات کی اطلاع پی ڈی ایم اے کی ہیلپ لائن 1129 پر دی جاسکتی ہے۔
