بالی ووڈ کے معروف اداکار جاوید جعفری کا ایکس اکاؤنٹ ہیک ہو گیا۔
جاوید جعفری نے 1 ہفتہ قبل فوٹو اینڈ ویڈیو شیئرنگ ایپ انسٹاگرام پر اپنے مداحوں کو اطلاع دی تھی کہ ان کا ایکس اکاؤنٹ ہیک ہو گیا ہے۔
اُنہوں نے اپنی انسٹا پوسٹ میں ایک اسکرین شاٹ شیئر کیا تھا جس میں دیکھا جا سکتا ہے کہ ان کے پاس ان کا ایکس اکاؤنٹ لاگ اِن نہیں ہو رہا۔
بھارتی اداکار نے یہ اسکرین شاٹ شیئر کرتے ہوئے کیپشن میں لکھا ہے کہ سوشل میڈیا ویب سائٹ ایکس پر موجود میرا ایکس اکاؤنٹ ہیک ہو گیا ہے۔
اُنہوں نے لکھا کہ میں ان لوگوں سے مخلصانہ درخواست کرتا ہوں جو مجھے ایکس پر فالو کر رہے ہیں کہ اس بارے میں ایکس کو رپورٹ کریں، شکریہ۔
اب منگل کو ہیکر نے جاوید جعفری کے اکاؤنٹ پر ایک ٹوئٹ کیا کہ اگر آپ اپنا اکاؤنٹ واپس حاصل کرنا چاہتے ہیں تو مجھے میسیج کریں۔
پھر کل ایک اور ٹوئٹ کیا گیا جس میں لکھا ہے کہ جاوید جعفری کا اکاؤنٹ ہیک ہو گیا تھا تو میں نے کل اس اکاؤنٹ کو ہیکرز سے بازیاب کروا لیا ہے۔
ٹوئٹ میں مزید لکھا ہے کہ میں جاوید جعفری کو یہ اکاؤنٹ واپس دینا چاہتا ہوں، کوئی اُنہیں بتائے کہ میں نے اُنہیں ای میل بھی کی ہے۔
اس ٹوئٹ میں یہ بھی لکھا ہے کہ مجھے اب تک 30 لوگ میسیج کر چُکے ہیں جو یہ اکاؤنٹ حاصل کرنا چاہتے ہیں۔
جاوید جعفری کے ایکس اکاؤنٹ سے گزشتہ روز کیے گئے آخری ٹوئٹ میں یہ لکھا ہے کہ میں اپنا اکاؤنٹ واپس حاصل کرنے میں کامیاب ہو گیا ہوں اور آپ سب کے تعاون کے لیے دل کی گہرائیوں سے آپ کا شکریہ ادا کرتا ہوں۔
ٹوئٹ میں لکھا ہے کہ کیا اس موقع پر ہم مل کر ایک تفریحی میم کوائن بنائیں؟
بھارتی اداکار کے ایکس اکاؤنٹ سے کیے گئے آخری ٹوئٹ سے بظاہر ایسا لگ رہا ہے کہ وہ اپنا اکاؤنٹ دوبارہ حاصل کرنے میں کامیاب ہو گئے ہیں لیکن پہلگام میں پیش آنے والے واقعے کے بعد موجودہ صورتحال میں تفریحی میم کوائن بنانے والی بات کی وجہ سے ان کے مداحوں کا خیال ہے کہ ان کا اکاؤنٹ ابھی تک ہیکرز کے کنٹرول میں ہی ہے۔
