کراچی(عبدالماجد بھٹی) پاکستان کرکٹ بورڈ نے ڈومیسٹک کرکٹ ڈھانچے کو پر کشش بنانےکیلئے بدھ کو ایک اصلاحاتی کمیٹی بنائی ہے جسے پانچ دن میں رپورٹ دینے کی ہدایت کی گئی ہے۔ کمیٹی میں عاقب جاوید اور وہاب ریاض بھی شامل ہیں جن کے فیصلوں پر سابق کرکٹرز تنقید کرتے رہے ہیں۔ وہاب ریاض چیف سلیکٹر اور منیجر جبکہ عاقب جاوید سلیکٹر اور ہیڈ کوچ رہ چکے ہیں۔ جنگ کے پاس موجود پی سی بی کے لیٹر کے مطابق پانچ رکنی کمیٹی میں چیئرمین کے ایڈوائزر بلال افضل، چیف آپریٹنگ آفیسر سمیر احمد سید، ڈائر یکٹر چیمپئنز ایونٹ وہاب ریاض، رکن قومی سلیکشن کمیٹی عاقب جاوید اور صدر لاہور ریجن خواجہ ندیم شامل ہیں۔ یہ کمیٹی ایسے وقت میں بنائی گئی ہے جب ڈومیسٹک ڈھانچے پر تنقید ہورہی ہے ۔ گذشتہ سال قومی انڈر19کرکٹ ٹورنامنٹ ایک دن بعد ختم کردیا گیا تھا۔
