(ویب ڈیسک)معروف بھارتی گلوکارہ نیہا ککڑ نے میلبورن کنسرٹ تنازع پرخاموشی توڑدی۔
گلوکارہ نے اپنے سوشل میڈیا اکاؤنٹ پر پیغام جاری کر کے کنسرٹ میں 3 گھنٹے تاخیر سے پہنچنے کی وجہ بتا دی۔
فوٹو اینڈ ویڈیو شیئرنگ پلیٹ فارم انسٹا گرام پر نیہا ککڑ نے اسٹوری شیئر کر تے ہوئے کہا کہ جب سچ سامنے آئے گا تو آپ لوگ مجھے جج کرنے پر افسوس کریں گے۔
نیہا ککڑ نے طویل پوسٹس شیئر کر کے کنسرٹ میں ہونے والی بدانتظامی کا ذمہ دار ایونٹ آرگنائزر کو ٹھہراتے ہوئے کہاکہ یہ تو باآسانی کہہ دیا گیا کہ میں 3 گھنٹے تاخیر سے پہنچی لیکن کیا کسی نے یہ جاننے کی کوشش کی کہ میرے ساتھ کیا ہوا؟ میرے بینڈ کے ساتھ کیا ہوا؟ جب میں سٹیج پر بات کر رہی تھی تو میں نے کسی کو کچھ نہیں بتایا کہ ہوا کیا ہے کیونکہ میں نہیں چاہتی تھی کہ کسی کو بھی نقصان پہنچے، میں کسی کو سزا دینے والی کون ہوتی ہوں لیکن اب بات میرے نام پر آ گئی ہے اس لیے خاموش نہیں رہوں گی۔
معروف گلوکارہ نے کہا کہ کیا آپ یہ جانتے ہیں کہ میں میلبورن کنسرٹ میں پرفارمنس کے پیسے نہیں لے رہی تھی؟لیکن آرگنائزر میرے اور دوسروں کے پیسے لے کر فرار ہو گیا تھا، میرے بینڈ کو کھانا، ہوٹل یہاں تک کہ پانی تک نہیں دیا گیا، انہیں میرے شوہر اور ان کی ٹیم نے کھانا مہیا کیا،اس کے باوجود صرف مداحوں کی خاطر ہم نے پرفارم کیا۔
یہ بھی پڑھیں:میرب علی نے جلد شادی کا عندیہ دیدیا،مہمانوں کی فہرست بھی بنالی
گلوکارہ نے کہا بروقت ادائیگی نہ ہونے کی وجہ سے عین موقع پر ساؤنڈ چیک والوں نے ساؤنڈ کے لیے منع کر دیا جس کی وجہ سے ہمیں آخری وقت تک یہ نہیں معلوم تھا کہ کنسرٹ ہو رہا ہے یا نہیں؟آرگنائزرز میرے مینجر کی کالز تک نہیں اٹھا رہے تھے کیونکہ وہ تو سب کے پیسے لے کر فرار ہو چکے تھے، میرے پاس بتانے کے لیے بہت کچھ ہے لیکن اتنا کافی ہے۔
نیہا ککڑ نے اس مشکل وقت میں ساتھ دینے والوں اوراپنی حمایت میں سامنے آنے والوں کا شکریہ ادا کیا ہے۔
