بھارتی شہر بنگلورو میں مبینہ طور پر سڑک پر کچرا پھینکنے سے منع کرنے پر 3 افراد نے ایک پروفیسر کو پیٹ ڈالا۔
بھارتی میڈیا کے مطابق بھارتی شہر بنگلورو کے ایک کالج پروفیسر اربیندو گپتا کو 3 افراد نے تشدد کا نشانہ بنایا جس سے ان کی آنکھ کے پاس، ناک کی ہڈی میں فریکچر ہو گیا۔
پروفیسر گپتا نے بتایا کہ واقعہ سہ پہر 4 بجے پیش آیا جب میں اپنی موٹر سائیکل پر کہیں جا رہا تھا، میں نے 1 گاڑی میں سوار 3 لوگوں کو پلاسٹک کپ سڑک پر پھینکتے دیکھا۔
انہوں نے بتایا کہ میں نے گاڑی میں بیٹھے افراد کو جب کچرا پھینکنے سے منع کیا تو انہوں نے مجھے اوور ٹیک کیا اور پھر کچھ گلاس سڑک پر پھینکے، میں اُن کے قریب گیا اور کہا کہ سڑک پر کچرا مت پھینکیں تو وہ غصے میں آ گئے اور میری بائیک رکوا کر مجھے پیٹنا شروع کر دیا۔
ان 3 میں سے 2 نے مجھ پکڑ رکھا تھا جبکہ تیسرا مجھے مکّے مار رہا تھا۔
انہوں نے بتایا کہ تھوڑی دیر بعد پولیس اہلکار موقع پر پہنچے جنہوں نے مجھے اسپتال پہنچایا اور ایف آئی آر کاٹی۔
