بھارتی کرکٹ ٹیم کے سابق کپتان محمد اظہرالدین حیدرآباد کے اسٹیڈیم سے اپنا نام ہٹائے جانے پر برس پڑے اور کہا کہ کبھی کبھی افسوس ہوتا ہے کہ میں نے کرکٹ کھیلی۔
سابق بھارتی کپتان محمد اظہرالدین کو اس وقت شدید دکھ اور صدمہ پہنچا جب حیدرآباد کرکٹ ایسوسی ایشن نے راجیو گاندھی انٹرنیشنل اسٹیڈیم کی نارتھ پویلین اسٹینڈ سے ان کا نام ہٹانے کا فیصلہ کیا۔
اظہرالدین نے اس اقدام کو کھیل کےلیے باعثِ شرم قرار دیا اور بھارتی کرکٹ بورڈ بی سی سی آئی سے مطالبہ کیا کہ وہ اس معاملے میں مداخلت کرے۔
یہ قدم جسٹس وی ایشوریا جو حیدرآباد کرکٹ ایسوسی ایشن (ایچ سی اے) کے ایتھکس آفیسر اور امبڈزمن ہیں، کی جانب سے ایک پٹیشن کے جواب میں اٹھایا گیا۔
یہ پٹیشن مقامی ادارے لارڈز کرکٹ کلب کی جانب سے دائر کی گئی تھی جس میں الزام لگایا گیا تھا کہ اظہرالدین نے ایچ سی اے کے صدر کی حیثیت سے فیصلے کرتے وقت مفاد پرستی اور جانبداری کا مظاہرہ کیا۔
پٹیشن میں کہا گیا کہ ان کے کچھ اقدامات ذاتی فائدے کےلیے تھے، جو شفافیت اور غیرجانبداری کے اصولوں کے خلاف ہیں۔
اظہرالدین کا ردعمل
اظہرالدین نے عرب میڈیا سے بات کرتے ہوئے کہا، ’دل دکھتا ہے یہ کہتے ہوئے کہ کبھی کبھی افسوس ہوتا ہے کہ میں نے کرکٹ کھیلی۔ آج ایسے لوگ کھیل کی رہنمائی کر رہے ہیں جنہیں کرکٹ کی سمجھ بوجھ ہی نہیں، یہ کھیل کے ساتھ ایک بدتمیزی ہے۔‘
انہوں نے مزید کہا، ’میں اس ناانصافی کے خلاف قانونی کارروائی کا ارادہ رکھتا ہوں اور بی سی سی آئی سے اپیل کرتا ہوں کہ وہ اس معاملے میں مداخلت کرے۔‘
انکا کہنا تھا کہ یہ مسئلہ تنہا نہیں، سن رائزرز حیدرآباد کی بھی ایسوسی ایشن سے پاسز کے معاملے پر ٹکراؤ ہوا، جو ناقص گورننس کا ثبوت ہے۔”
اظہرالدین نے مزید کہا، ’جو کچھ ہو رہا ہے وہ سمجھ سے باہر ہے اور ذاتی طور پر مجھے تکلیف دیتا ہے۔ مجھے ایچ سی اے انتخابات میں صرف اس لیے حصہ لینے نہیں دیا گیا کیونکہ میں نے نظام میں موجود کرپشن کو بے نقاب کیا۔‘
آئی پی ایل میچز میں نام کے استعمال پر پابندی
ایچ سی اے کو ہدایت دی گئی ہے کہ آئی پی ایل 2025 کے دوران کسی بھی ٹکٹ پر محمد اظہرالدین کا نام استعمال نہ کیا جائے۔ راجیو گاندھی اسٹیڈیم میں مزید میچز ہونے ہیں، جن میں سن رائزرز کے تین ہوم میچز اور کوالیفائر 1 اور ایلیمینیٹر بھی شامل ہیں۔
وی وی ایس لکشمن کے نام کی تجویز
پٹیشن میں صرف اظہرالدین کا نام ہٹانے کی ہی درخواست نہیں کی گئی بلکہ یہ بھی مطالبہ کیا گیا کہ نارتھ پویلین اسٹینڈ کو حیدرآباد کے لیجنڈری بلے باز وی وی ایس لکشمن کے نام سے منسوب کیا جائے۔ اس مقصد کے لیے نہ صرف اسٹیڈیم میں بورڈ تبدیل کیا جائے بلکہ تمام ٹکٹس اور متعلقہ مواد میں بھی نئے نام کا استعمال کیا جائے۔
درخواست گزار نے آخر میں زور دیا کہ انصاف اور شفافیت کو یقینی بنانے کے لیے امبڈزمن مزید احکامات بھی جاری کرے۔
