کراچی کے علاقے ڈیفنس بدر کمرشل کے قریب واقع ایک موبائل فون شاپ میں ڈکیتی کی واردات پیش آئی ہے جہاں مسلح ڈاکو اسلحے کے زور پر لاکھوں روپے مالیت کے موبائل فونز لوٹ کر فرار ہوگئے۔
پولیس کے مطابق نامعلوم مسلح ملزمان موبائل فون شاپ میں داخل ہوئے اور عملے کو اسلحہ دکھا کر یرغمال بنایا۔ ڈاکو دکان میں موجود موبائل فونز سے بھرے کارٹن اٹھا کر لے گئے جن کی مالیت 40 سے 50 لاکھ روپے کے درمیان بتائی جا رہی ہے۔ واقعے کی اطلاع ملتے ہی پولیس موقع پر پہنچ گئی اور شواہد اکٹھے کرکے تحقیقات کا آغاز کر دیا گیا ہے۔
واقعے کا نوٹس لیتے ہوئے وزیر داخلہ سندھ ضیاء الحسن لنجار نے ایس ایس پی ساؤتھ سے فوری طور پر تفصیلی رپورٹ طلب کر لی ہے۔ وزیر داخلہ سندھ نے واضح ہدایات دیتے ہوئے کہا ہے کہ شہریوں اور تاجروں کے جان و مال کا تحفظ حکومت کی اولین ترجیح ہے اور اس ضمن میں کسی قسم کی غفلت برداشت نہیں کی جائے گی۔
وزیر داخلہ سندھ نے ڈکیتی میں ملوث ملزمان کی فوری گرفتاری اور لوٹے گئے موبائل فونز کی جلد برآمدگی کو یقینی بنانے کے احکامات جاری کیے ہیں۔ ان کا کہنا تھا کہ ملزمان کی گرفتاری کے لیے جدید تفتیشی ٹیکنالوجی اور پروفیشنل پولیسنگ کے تمام وسائل بروئے کار لائے جائیں جبکہ واردات میں ملوث سہولت کاروں کو بھی قانون کے کٹہرے میں لایا جائے۔
ضیاء الحسن لنجار نے مزید ہدایت کی کہ ڈکیتی کے واقعات میں ملوث گروہوں کے خلاف ٹارگٹڈ کارروائیاں اور انٹیلی جنس بیسڈ آپریشنز کو مزید تیز کیا جائے۔ انہوں نے کہا کہ تاجروں کا اعتماد بحال کرنا پولیس کی ذمہ داری ہے اور جرائم پیشہ عناصر کے خلاف زیرو ٹالرنس پالیسی پر سختی سے عمل کیا جائے گا۔
وزیر داخلہ سندھ نے ایس ایس پی ساؤتھ کو ہدایت کی ہے کہ تفتیش کی پیش رفت سے باقاعدگی سے دفتر کو آگاہ رکھا جائے۔ پولیس حکام کے مطابق واقعے میں ملوث ملزمان کی تلاش کے لیے سی سی ٹی وی فوٹیجز اور دیگر شواہد کی مدد لی جا رہی ہے۔
