بھارت کے سابق کرکٹ کپتان سنیل گواسکر نے کولکتہ میں لیونل میسی کی موجودگی کے دوران ہونے والے ہنگامے پر ایونٹ منتظمین کے بجائے عالمی شہرت یافتہ فٹبالر کو موردِ الزام ٹھہرا دیا۔
لیونل میسی کے تین روزہ گوٹ انڈیا ٹور 13 سے 15 دسمبر کے دوران کولکتہ، حیدرآباد، ممبئی اور نئی دہلی تک پھیلا ہوا تھا، جو ان کا 14 سال بعد بھارت کا پہلا دورہ تھا۔
دورے کا آغاز کولکتہ میں شدید بدانتظامی کے ساتھ ہوا، جہاں سالٹ لیک اسٹیڈیم میں شائقین نے توڑ پھوڑ کی، شائقین اس وقت مشتعل ہوئے جب میسی مقررہ وقت کے بجائے صرف 5 منٹ کے لیے اسٹیڈیم میں نظر آئے، مہنگے ٹکٹ خریدنے والے مداحوں کو ان کے ہیرو کی محض ایک جھلک ہی نصیب ہوئی۔
واقعے کے بعد مغربی بنگال کی وزیر اعلیٰ ممتا بنرجی نے مداحوں سے معذرت کی اور معاملے کی تحقیقات کے لیے اعلیٰ سطح کمیٹی قائم کر دی، اس دوران ایک ایونٹ آرگنائزر کو بھی گرفتار کیا گیا۔
تاہم سنیل گواسکر نے اپنے کالم میں منتظمین کا دفاع کرتے ہوئے سارا الزام میسی پر عائد کردیا۔
ان کا کہنا تھا کہ ہر کسی کو قصور وار ٹھہرایا گیا، سوائے اس شخص کے جس نے اپنا وعدہ پورا نہیں کیا۔
گواسکر نے مزید لکھا کہ اگر معاہدے کے مطابق میسی کو ایک گھنٹے کے لیے وہاں موجود رہنا تھا اور وہ اس سے پہلے روانہ ہو گئے، تو اصل ذمہ داری ان کی اور ان کے قریبی ساتھیوں پر عائد ہوتی ہے، ہزاروں روپے خرچ کر کے آنے والے شائقین سے میسی یا ان کے ساتھیوں کو کوئی خطرہ نہیں تھا۔
انہوں نے سوال اٹھایا کہ اگر میسی اسٹیڈیم میں کوئی عملی سرگرمی، جیسے پنالٹی کک انجام دیتے تو وی آئی پیز خود بخود پیچھے ہٹ جاتے اور شائقین اپنے ہیرو کو کھیلتے دیکھ پاتے۔
گواسکر نے کہا کہ میسی کا دورۂ حیدرآباد،، ممبئی اور نئی دہلی میں بغیر کسی مسئلے کے مکمل ہوا، جو اس بات کا ثبوت ہے کہ مسئلہ منتظمین کے بجائے وعدوں کی عدم تکمیل کا تھا۔
انہوں نے کہا کہ کولکتہ میں اپنے ہی لوگوں کو موردِ الزام ٹھہرانے سے پہلے یہ دیکھنا ضروری ہے کہ دونوں فریقین نے اپنے وعدے پورے کیے یا نہیں۔
