معروف اداکارہ کومل عزیز نے کہا ہے کہ قریبی لوگ بھی حسد کر کے غلط مشورے دے سکتے ہیں۔
نجی ٹی وی کے پروگرام میں گفتگو کرتے ہوئے انہوں نے کہا کہ بعض اوقات انسان کو سب سے زیادہ نقصان قریبی لوگ ہی پہنچاتے ہیں جو حسد کی وجہ سے غلط مشورے دیتے ہیں۔
ان کا کہنا تھا کہ جیسے آپ ہوتے ہیں، آپ سمجھتے ہیں دنیا بھی ویسی ہی ہے، یہ وہ غلطی ہے جو انسان اپنی جوانی میں کرتا ہے، آپ کو سمجھنا چاہیے کہ دنیا آپ جیسی نہیں ہے۔
انہوں نے مزید کہا کہ جس نظر سے آپ خود کو دیکھتے ہیں، ہر کوئی آپ کو ویسے نہیں دیکھے گا، میں نے دیکھا ہے کہ لڑکیوں کو سکھایا جاتا ہے کہ لڑکوں سے زیادہ بات نہ کریں، کیونکہ وہ لڑکیاں ہیں۔
اداکارہ نے بتایا کہ لڑکیاں اپنی نوکری، شادی اور زندگی کے کئی فیصلے دوستوں سے شیئر کرتی ہیں، لیکن کبھی کبھار وہی دوست حتیٰ کہ بہنیں بھی حسد میں غلط مشورہ دے سکتی ہیں، یہ میں نے کم عمری میں نہیں سیکھا تھا، لیکن اب سمجھ آگیا ہے۔
کومل عزیز نے مزید کہا کہ ایسے لوگ بہت کم ہوتے ہیں جو دوسروں کو نیچا نہیں دکھاتے، فضیلہ قیصر ان میں سے ایک ہیں اور ان جیسے لوگ بہت کم ملتے ہیں۔
