کراچی(اسٹاف رپورٹر)بنگلہ دیش نے پاکستان ویمنز انڈر 19 کو تیسرے ٹی ٹوئنٹی میچ میں 7 وکٹوں سے شکست دے کرپانچ میچوں کی سیریز میں دو ایک کی برتری حاصل کرلی۔اتوار کو کاکسز بازار اکیڈمی میں کھیلے گئے میچ میں پاکستان نے ٹاس جیت کر پہلے بیٹنگ کی اور 20 اوورز میں 8 وکٹوں کے نقصان پر 86 رنز بنائے۔ کپتان ایمان نصیر نے پانچ چوکوں کی مدد سے 23 رنز سکور کیے۔ میمونہ خالد نے آؤٹ ہوئے بغیر 18 اور ذوفشاں ایاز نے 14 رنز بنائے۔بنگلہ دیش کی طرف سے اوتوشی مجومدار اور حبیبہ اسلام نے دو دو وکٹیں حاصل کیں۔جواب میں میزبان ٹیم نے مطلوبہ اسکور 13 اعشاریہ 3 اوورز میں تین وکٹوں کے نقصان پر پورا کرلیا۔کپتان سعدیہ اسلام نے تین چھکوں اور تین چوکوں کی مدد سے 35 رنز سکور کیے۔ اچینا جنت ایمانتا نے 3چوکوں اور ایک چھکے کی مدد سے30 رنز بنائے اور آؤٹ نہیں ہوئیں۔ روزینہ اکرم میمونہ خالد اور ماہ نور زیب نے ایک ایک وکٹ حاصل کی۔حبیبہ اسلام 25 رنز پر دو وکٹوں کی عمدہ کارکردگی پر پلیئر آف دی میچ قرار پائیں۔ سیریز کا چوتھا میچ 10 دسمبر اور پانچواں میچ 12 دسمبر کو کھیلا جائے گا۔
