آسٹریلیا میں بگ بیش لیگ کھیلنے والے قومی کرکٹرز کو سری لنکا کے خلاف ٹی ٹوئنٹی سیریز کے لیے ٹیم میں منتخب ہونے کی صورت میں لیگ چھوڑنا پڑے گی۔
ذرائع کا بتانا ہے کہ قومی کرکٹرز کو غیر ملکی لیگز کے لیے مشروط این او سی جاری کیے جاتے ہیں، قومی ڈیوٹی کے لیے کھلاڑیوں کو خود کو دستیاب رکھنا پڑتا ہے۔
بی بی ایل کے لیے قومی کرکٹرز کو 14 دسمبر سے 28 جنوری تک این او سی جاری کیے گئے ہیں۔ بابر اعظم، محمد رضوان، شاہین آفریدی، حارث رؤف، شاداب خان اور حسن علی کو این او سی جاری ہوئے ہیں۔
اِس دوران پاکستان ٹی ٹوئنٹی ٹیم کو تین میچز کی سیریز کے لیے سری لنکا کا دورہ کرنا ہے، ٹی ٹوئنٹی میچز 7، 9 اور 11 جنوری کو دمبولا میں کھیلے جائیں گے۔ یہ سیریز ٹی ٹوئنٹی ورلڈکپ 2026 کی تیاریوں کے سلسلے میں رکھی گئی ہے۔
ذرائع کے مطابق قومی کرکٹرز ٹیم میں منتخب ہونے کی صورت میں آسٹریلیا سے سری لنکا جائیں گے تاہم اس بات کا امکان کم ہے کہ ٹی ٹوئنٹی اسکواڈ کے مستقل کھلاڑیوں کو سری لنکا سیریز سے استثنیٰ دیا جائے۔
