وزیرِ اعظم شہباز شریف کا کہنا ہے کہ کرغزستان نے اپنے حصے کا کاسا 1000 منصوبہ مکمل کر لیا ہے، منصوبے کا پاکستان کا حصہ جلد مکمل کر لیا جائے گا۔
پاکستان کرغزستان بزنس فورم کا انعقاد کیا گیا جس سے خطاب کرتے ہوئے وزیرِ اعظم شہباز شریف نے کہا کہ کرغزستان کا وفد 20 سال بعد پاکستان کے دورے پر ہے۔
انہوں نے کہا کہ ریل منصوبہ خطے کے لیے اہم ہے، ہم نے منصوبے کے لیے ایم او یو پر دستخط کیے ہیں، پاکستان کے 8500 طلباء کرغزستان میں تعلیم حاصل کر رہے ہیں۔
وزیرِ اعظم شہباز شریف کا کہنا ہے کہ پاکستان میں سرمایہ کاری کے لیے ون ونڈو آپریشن شروع کیا گیا ہے، پاکستانی حکومت سرمایہ کاروں کو مکمل سہولت فراہم کر رہی ہے۔
ان کا کہنا ہے کہ ہم صوبوں کے نوجوانوں کو ترقی کے مواقع فراہم کرنے کے لیے مکمل تعاون کر رہے ہیں، پاکستان اور کرغزستان آئی ٹی اور دیگر شعبوں میں اہم کردار ادا کر سکتے ہیں۔
وزیرِ اعظم شہباز شریف کا یہ بھی کہنا ہے کہ پاکستان میں ٹیکسٹائل، زراعت اور آئی ٹی تیزی سے فروغ پا رہے ہیں۔
