سابق فیفا ریفری، نیشنل فٹبالر اور منیجر کے ایم سی فٹبال اسٹیڈیم احمد جان طویل علالت کے بعد بدھ کی دوپہر انتقال کرگئے۔
مرحوم کی نماز جنازہ کے ایم سی فٹبال اسٹیڈیم میں ادا کی گئی جس میں سابق انٹرنیشنل، نیشنل فٹبالرز، سندھ فٹبال ایسوسی ایشن کے سابق سیکریٹریز سمیت ڈسٹرکٹ فٹبال ایسوسی ایشن اور کلبز کے عہدیداران اور دیگر شخصیات نے شرکت کی۔
احمد جان کی عمر تقریباً 75سال تھی، انھوں نے بحیثیت گول کیپر قدیم فٹبال کلب مکران اسپورٹس اولڈ گولی مار گٹر باغچہ ڈسٹرکٹ ویسٹ سے آغاز کیا۔ بعد میں وہ کے ایم سی فٹبال ٹیم سے وابستہ ہوگئے۔
فٹبال ٹیم سے الگ ہونے کے بعد ریفری کے طور پر خدمات انجام دیں۔ فٹبال سے انہیں جنون کی حد تک لگاؤ تھا، وہ خود کو کے ایم سی فٹ بال اسٹیڈیم کا چوکیدار کہلانے پر فخر محسوس کرتے تھے اور فٹ بال کی بہتری کیلئے ہمیشہ متحرک رہے۔
