پاکستان کرکٹ ٹیم کے وائٹ بال ہیڈ کوچ مائیک ہیسن کا کہنا ہے کہ ڈھاکا کی پچ انٹرنیشنل کرکٹ کے لیے ناقابلِ قبول ہے۔
مائیک ہیسن نے پہلے ٹی 20 میچ میں شکست کے بعد شیرِ بنگلہ نیشنل اسٹیڈیم کی پچ پر تنقید کرتے ہوئے کہا کہ میرے خیال میں یہ پچ کسی کے لیے بھی مثالی نہیں ہے۔
اُنہوں نے کہا کہ ہم ایشیا کپ اور ٹی 20 ورلڈ کپ کی تیاری کے لیے کوشاں ہیں ایسی صورتحال میں یہ پچ قابل قبول نہیں ہے۔
مائیک ہیسن نے اعتراف کرتے ہوئے کہا کہ ہم نے بھی بیٹنگ کے دوران کچھ غلط فیصلے کیے لیکن یہ پچ بھی بین الاقوامی معیار کے مطابق نہیں ہے۔
اُنہوں نے کہا کہ فخر زمان نے کچھ جارحانہ شاٹس کھیلے جس سے ہمیں غلط تاثر ملا، درمیان اوورز میں ناقص شاٹس کھیلنے سے ہمیں نقصان ہوا۔ گیند جب سیم اور باؤنس کرنے لگی تو ہم خطرے کا اندازہ نہیں لگا سکے۔
اُنہوں نے اس بات پر زور دیا کہ اس قسم کی پچز پر کھیلنے سے ناصرف ٹیمز کی تیاری بلکہ کھلاڑیوں کی تکنیکی ترقی بھی متاثر ہوتی ہے۔
دوسری جانب بنگلا دیشی اوپنر پرویز حسین ایمان نے مائیک ہیسن کے بیان سے اختلاف کرتے ہوئے کہا کہ ہمیں تو پچ خراب محسوس نہیں ہوئی اور ہم نے ہدف 16 اوورز سے بھی کم میں حاصل کر لیا۔
اُنہوں نے مزید کہا کہ اگر ہم 20 اوورز کھیلتے تو 150 یا 160 رنز آسانی سے بن سکتے تھے کیونکہ ہم نے حالات کا بہتر اندازہ لگایا۔
واضح رہے کہ میزبان بنگلا دیش نے 3 میچز کی سیریز میں 0-1 سے برتری حاصل کرلی ہے اور اب دوسرا ٹی 20 آج اسی اسٹیڈیم میں کھیلا جائے گا۔